![](/3/images/news/2023/05/2023-05-28-1tBExMCJPAs.jpg)
31 мая ў Нацыянальным санктуарыі Маці Божай Будслаўскай адзначаць адпустовую ўрачыстасць Адведзінаў Найсвяцейшай Паннай Марыяй святой Альжбеты.
Першы касцёл, пабудаваны ў Будславе ў XVII стагоддзі, быў пасвячаны пад тытулам Адведзінаў Найсвяцейшай Паннай Марыяй святой Альжбеты. Гэтая святыня з унікальным разблёным алтаром — так званы «стары касцёл» — сёння з’яўляецца часткай Нацыянальнага санктуарыя, непасрэдна злучанай з асноўным касцёлам, дзе ў галоўным алтары знаходзіцца цудадзейны абраз.
Успамін Адведзінаў святой Альжбеты традыцыйна святкуецца ў будслаўскай парафіі як адпуст.
У сераду 31 мая ў будслаўскай базыліцы а 18-й гадзіне адбудзецца святая Імша, цэлебрацыю якой узначаліць арцыбіскуп эмэрыт Тадэвуш Кандрусевіч у 42-ю гадавіну святарства. Заслужаны іерарх прыняў прэзбітэрскае пасвячэнне 31 мая 1981 года.
Пробашч будслаўскай парафіі ксёндз Дзмітрый Дубовік ад імя мясцовых вернікаў запрашае ўсіх ахвотных узяць удзел у адпустовай урачыстасці, або духоўна далучыцца з дапамогай прамой трансляцыі на YouTube-канале Нацыянальнага санктуарыя Маці Божай Будслаўскай.
У Будславе традыцыйна адзначаюцца тры адпусты: Адведзінаў Найсвяцейшай Паннай Марыяй святой Альжбеты (31 мая); Маці Божай Будслаўскай (2 ліпеня; апошнім часам — першая субота ліпеня); Унебаўзяцця Найсвяцейшай Панны Марыі (тытул будслаўскай базылікі, 15 жніўня).