![](/3/images/news/2021/06/2020-06-26-hv9rnspz23.jpg)
У суботу 26 чэрвеня ў парафіяльным касцёле Беззаганнага Зачацця Найсвяцейшай Панны Марыі ў Гродне (Паўднёвы) адбудзецца святая Імша аб вечным жыцці для спачылага ксяндза прэлата Юзафа Трубовіча ў першую гадавіну яго смерці.
Пачатак святой Імшы ў 12.00.
Да ўдзелу запрашаюцца ўсе святары, сёстры законныя і свецкія вернікі, каб супольна памаліцца аб жыцці вечным для спачылагa душпастыра, які прычыніўся да адраджэння веры на нашых землях.
Юзаф Трубовіч нарадзіўся на Віцебшчыне ў вёсцы Невярышкі 6 студзеня 1926 г.
Скончыў Вышэйшую духоўную семінарыю ў Рызе (Латвія), там жа атрымаў прэзбітэрскае пасвячэнне з рук біскупа Казіміра Дульбінскага 30 верасня 1956 г. Пасля пасвячэння 20 гадоў нёс служэнне ў Латвіі, а потым прыехаў у Гродна і на працягу 12 гадоў працаваў у францішканскім касцёле.
У 1988–1992 гг. быў прэфектам Вышэйшай духоўнай семінарыі ў Рызе, а ў наступныя сем гадоў — пробашчам катэдральнай парафіі святога Францішка Ксавэрыя ў Гродне.
З 1999 г. з’яўляўся рэзідэнтам у парафіі Беззаганнага Зачацця Найсвяцейшай Панны Марыі ў Гродне.
У момант смерці ксёндз прэлат Юзаф Трубовіч, які адышоў у вечнасць на 95-м годзе жыцця, быў найстарэйшым каталіцкім святаром у Беларусі.