1 мая ў магілёўскай катэдры Унебаўзяцця Найсвяцейшай Панны Марыі і святога Станіслава, якая з’яўляецца юбілейным касцёлам у Год святога Юзафа, адбудзецца цэлебрацыя адпустовай святой Імшы.
1 мая ў паўсюдным Касцёле адзначаецца ўспамін святога Юзафа, рамесніка. Згодна з дэкрэтам Апостальскай Пэнітэнцыярыі ад 8 снежня 2020 г. аб атрыманні асаблівых адпустаў з нагоды Юбілейнага года ў гонар святога Юзафа, у гэты дзень можна атрымаць поўны адпуст пры звычайных ўмовах (сакрамэнтальная споведзь, эўхарыстычная Камунія і малітва ў інтэнцыях Святога Айца), памаліўшыся таксама праз заступніцтва святога Юзафа.
Дапаможны біскуп Мінска-Магілёўскай архідыяцэзіі, біскупскі вікарый для горада Магілёва і Магілёўскай вобласці Аляксандр Яшэўскі SDB запрашае ў гэты суботні дзень усіх ахвотных на Эўхарыстыю ў гонар святога Юзафа, каб супольна перажыць юбілейную падзею рэгіёну.
Урачыстая святая Імша распачнецца у 11.00. З 10.00 будзе магчымасць прыступіць да сакрамэнту пакаяння.
«Няхай святы Юзаф выпрошвае для нашай краіны, народа, Касцёла і ўсяго свету благаслаўленне Усемагутнага Бога», — адзначае ў запрашэнні біскуп Яшэўскі.
