Ва ўрачыстасць Звеставання Пана 25 сакавіка ў адпаведнасці з распараджэннем Старшыні Канферэнцыі Каталіцкіх Біскупаў у Беларусі адбудзецца прысвячэнне нашай краіны і яе народа Беззаганнаму Сэрцу Найсвяцейшай Панны Марыі.
У магілёўскім катэдральным касцёле Унебаўзяцця Найсвяцейшай Панны Марыі ў 11.00 распачнецца цэлебрацыя ўрачыстай святой Імшы, якую ўзначаліць Біскупскі вікарый для горада Магілёва і Магілёўскай вобласці біскуп Аляксандр Яшэўскі SDB.
Адразу пасля Эўхарыстыі адбудзецца выстаўленне Найсвяцейшага Сакрамэнту, адарацыя, малітва «Ойча наш» у інтэнцыі выбаўлення свету ад каранавірусу, а таксама Акт Прысвячэння Беларусі Беззаганнаму Сэрцу Марыі.
Набажэнствы пройдуць таксама ў іншых касцёлах Магілёва і Магілёўшчыны, перадусім у Бялынічах — месцы, дзе калісьці знаходзіўся славуты марыйны санктуарый з цудадзейным абразом Маці Божай Бялыніцкай, каранаваным у XVIII стагоддзі папскімі каронамі.
