У першую пятніцу чэрвеня прапануем пазнаёміцца з пяцю крокамі штодзённага рахунку сумлення паводле метаду святога Ігнацыя Лаёлы.
Юбілейны год у гонар 500-годдзя навяртання заснавальніка ордэна езуітаў ва ўсім свеце выклікаў новую зацікаўленасць ігнацыянскай духоўнасцю, якая перажыла выпрабаванне часам і прынесла вялікі духоўны плён у жыцці многіх пакаленняў вернікаў.
Адзін з важных пунктаў гэтай духоўнасці — штодзённы рахунак сумлення, які займае 15 хвілін.
Такі рахунак сумлення з’яўляецца штодзённай малітвай кожнага езуіта і не служыць непасрэдна для падрыхтоўкі да споведзі, хоць вельмі моцна ў гэтым дапамагае. Таму вопытныя духоўныя кіраўнікі раяць кожны вечар прысвячаць 15 хвілін разважанню над тым, што адбылося на працягу дня, які водгук выклікала ў душы, розуме і сэрцы, і дзе быў прысутны Бог ва ўсім тым, што нас цэлы дзень займала і чым мы жылі.
Для гэтай малітвы прапануецца ўвечары застацца на 15 хвілін у цішыні, адарвацца ад мітусні і зрабіць пяць простых крокаў.
Крок 1: Падзякаваць
Узгадаць усё добрае, што было на працягу дня, нават калі ён быў вельмі цяжкім. За што я магу падзякаваць Богу сёння?
Крок 2: Папрасіць святла
Пастарацца паглядзець на свой дзень вачыма добрага Бога, які жадае мне дапамагчы.
3. Паўтарыць свой дзень
Пастарацца прыгадаць усе моманты дня, які завяршаецца, і заўважыць, што мяне ўздымала ўгору, а што апускала ўніз.
4. Папрасіць прабачэння ў Бога
Шчыра прызнаць усё тое, што раніла мяне і іншых, і перапрасіць за гэта.
5. Паабяцаць зрабіць крок наперад з дапамогай Яго ласкі
Запытацца ў Езуса, што я магу зрабіць у жыцці лепш.
Гэтыя крокі могуць быць выкарыстаны і для рахунку сумлення ў межах падрыхтоўкі да споведзі.
