Набліжаецца 100-годдзе з дня нараджэння святога Яна Паўла ІІ, і біскуп Юзаф Станеўскі ў сваім блогу нагадвае пра тое, што казаў маладым хрысціянам гэты вялікі сябра моладзі.
Словы святога Яна Паўла ІІ
Дарагая моладзь, няхай вас захопіць святло Хрыста, і распаўсюджвайце гэтае святло, дзе б вы ні знаходзіліся.
«Святло асобы Езуса, — кажа Катэхізіс Каталіцкага Касцёла, — асвятляе вочы нашага сэрца і вучыць нас глядзець на ўсё ў святле Яго праўды і Яго спачування ўсім (пар. ККК 2715). Калі ваша сяброўства з Хрыстом, ваша веданне Яго таямніцы і ваша адданасць Яму будуць шчырымі і глыбокімі, вы станеце «дзецьмі святла» і станеце «святлом свету». Менавіта таму я паўтараю вам словы Евангелля: «Няхай святло ваша так свеціць перад людзьмі, каб яны бачылі вашы добрыя ўчынкі і праслаўлялі Айца вашага, які ў нябёсах» (Мц 5, 16).
У гэты вечар Папа разам з усімі вамі, моладдзю з усіх кантынентаў, абвяшчае ўсяму свету веру, якая падтрымлівае жыццё Касцёла. Хрыстус — гэта святло народаў.
Ён памёр і ўваскрос, каб даць надзею на вечнае жыццё ўсім вандроўнікам праз стагоддзі. Праўда Евангелля не крыўдзіць нічога, што чалавечае.
Менавіта таму я кажу вам сёння ўвечары: няхай святло Хрыста асвятляе ваша жыццё. Не чакайце, пакуль вы станеце старэйшымі, каб ступіць на шлях святасці. Святасць заўсёды маладая, як і вечнасць Бога. Пакажыце ўсім прыгажосць адносін з Богам, які надае сэнс вашаму жыццю. У пошуку справядлівасці, абароне міру, у вашай братэрскай і салідарнай самаахвярнасці няхай ніхто не будзе лепш за вас!
З прамовы Папы Яна Паўла ІІ на 17-х Сусветных днях моладзі ў Таронта, 2002 г.
***
Мае дарагія маладыя сябры, мы з вамі на працягу тыдня ўзгадвалі, што святы Ян Павел ІІ казаў вашым аднагодкам — моладзі на парозе трэцяга тысячагоддзя.
Як бачым, яго словы не страцілі сваёй актуальнасці і сёння і, думаю, закранулі многіх з вас.
На заканчэнне дазвольце нагадаць вам яшчэ адну просьбу святога Яна Паўла ІІ, якую ён скіраваў да сваіх маладых землякоў у 1997 годзе ў Познані:
«Будзьце вернымі сведкамі Уваскрослага Хрыста, ніколі не адступайце перад перашкодамі, якія сустракаеце на шляху вашага жыцця.
Я разлічваю на вас! Я разлічваю на ваш юнацкі энтузіязм і адданасць Хрысту.
Я ведаў <…> моладзь і ніколі не быў у ёй расчараваны. Свет патрабуе вас. Касцёл патрабуе вас. Будучыня <…> залежыць ад вас. Будуйце і ўмацоўвайце цывілізацыю любові на <…> зямлі».
