Пошук

14.05.2020 11:58   Паводле: КАІ / Пераклад і адаптацыя: Мікола Гракаў / Catholic.by
Выявы святой Кароны / manoramaonline.com

Калі ўвесь свет церпіць ад пандэміі каранавірусу, варта ўзгадаць асобу святой Кароны, мучаніцы першых стагоддзяў хрысціянства і заступніцы ад эпідэмій, успамін якой прыпадае 14 мая.

Як адзначае Каталіцкае інфармацыйнае агенцтва КАІ, хоць святая Карона была калісьці вельмі папулярнай у Касцёле, пра яе жыццё вядома зусім няшмат. Лічыцца, што яна нарадзілася каля 160 года і магла паходзіць з тэрыторыі сённяшняга Егіпта або Сірыі. Мучаніцкую смерць за веру прыняла ў 177 годзе (паводле іншых звестак, яна жыла ў 287–303 гадах).

Як апавядае жыццярыс, у маладым узросце Карона выйшла замуж за рымскага жаўнера Віктара, хрысціяніна з Сіены. Падчас пераследу хрысціянаў Віктар не згадзіўся адрачыся ад веры, за што быў пакараны смерцю. Маладая ўдава следам за сваім мужам таксама прыняла мучаніцкую смерць за веру падчас пераследу ў часы цэзара Антонія Пія або Дыяклетыяна.

Паводле эфіопскага жыццярысу, Віктар і Карона абодва належалі да хрысціянскай супольнасці.

Ушанаванне святых мучанікаў Віктара і Кароны з цягам часу распаўсюдзілася ва ўсім Касцёле на розных кантынентах: у Азіі, Афрыцы і Еўропе. У розных версіях жыццярысу месцам іх мучаніцкай смерці называецца Дамаск у Сірыі, Антыёхія на поўдні сучаснай Турцыі, Александрыя ў Егіпце, Сіцылія і Марсэль.

Рэліквіі верных сужонкаў-хрысціянаў з VI стагоддзя захоўваюцца ў прысвечаным ім касцёле ў Кастэльфідарда, што на ўзбярэжжы Адрыятычнага мора непадалёк ад Анконы (Італія). Часткі рэліквій ужо ў Сярэднявеччы былі прывезены таксама ў Ахен і Прагу. У гэты час святых Віктара і Карону ўшаноўваюць у Баварыі, Чэхіі і Ніжняй Аўстрыі.

Яны лічацца ўзорам вернасці ў веры і ахоўнікамі ад эпідэмій.

У Ніжняй Аўстрыі традыцыйна адбываліся штогадовыя пілігрымкі ў гонар святой Кароны. У 1504 г. у мястэчку Санкт-Карона-ам-Вексэль на камлі ліпы была знойдзена разблёная фігура святой і пабудавана капліца ў яе гонар. У Вене да сённяшняга дня дзейнічае аптэка святой Кароны.

Мучаніцтва святых Міны, Вінцэнта, Віктара і Кароны / orthodoianewsagency.gr

У Каталіцкім Касцёле ўспамін святой Кароны прыпадае 14 мая, адначасова са святам святога апостала Мацея. Сёлета ў гэты дзень ва ўсім свеце прадстаўнікі розных рэлігій узносяць малітвы да Бога Стварыцеля аб выбаўленні ад пандэміі каранавірусу, падмацоўваючы свае просьбы постам і ўчынкамі міласэрнасці.

Абноўлена 14.05.2020 12:02
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця