Ва ўрачыстасць Cпаслання Духа Святога прапануем у якасці кароткага духоўнага разважання ўрывак з твору святога Ірэнэя Ліёнскага «Супраць ерасяў» з сённяшняй літургічнай Гадзіны чытанняў.
Місія Духа Святога
Даючы вучням уладу адраджаць у Богу, Пан сказаў ім:
«Дык ідзіце і навучайце ўсе народы, і хрысціце іх у імя Айца і Сына, і Духа Святога»(Мц 28, 19).
Гэтага Духа Бог яшчэ праз прарокаў абяцаў спаслаць у апошнія часы на слугаў, каб яны прарочылі. Таму Бог сышоў і на Сына Божага, які стаў Сынам Чалавечым, і захацеў быць сярод чалавецтва, спачываць на людзях і жыць сярод стварэння Божага, каб выканаць волю Айца і адрадзіць людзей ад старэчы граху да новага жыцця ў Хрысце.
Як кажа св. Лука, пасля ўнебаўшэсця Пана ў дзень Пяцідзесятніцы на вучняў сышоў Дух Святы, які мае ўладу над усімі народамі, каб прывесці іх да жыцця і адкрыць ім Новы Запавет. Таму яны і спявалі разам на ўсіх мовах гімн Богу, а Дух Святы аб’ядноўваў аддаленыя плямёны і прыносіў іх Айцу як першую ахвяру ўсіх народаў.
Таму Пан і паабяцаў нам паслаць Суцяшыцеля, каб Ён падрыхтаваў нас для Бога. Бо як без вады нельга рашчыніць сухой мукі і зрабіць з яе адно цеста і адзін хлеб, так і мы не можам стаць адным у Хрысце Езусе без вады, якая паходзіць з неба. І як сухая зямля не прыносіць плёну без вільгаці, так і мы, якія былі засохлым дрэвам, ніколі не прынеслі б пладоў жыцця без дажджу, спасланага воляй нябёсаў.
Нашыя целы праз купель, якая дае нам нятленнасць, атрымалі еднасць, а душы нашыя аб’яднаў Дух Святы.
Дух Божы сышоў на Пана, «Дух мудрасці і разумення, Дух парады і мужнасці, Дух пазнання і пабожнасці, Дух боязі Божай» (пар. Іс 11, 2). Пан даў Касцёлу гэтага Духа, спасылаючы для ўсёй зямлі Суцяшыцеля з неба туды, куды, паводле слоў Пана, «д’ябал падаў, як маланка» (пар. Лк 10, 18).
Таму нам неабходна гэтая Божая раса, каб мы не былі спаленыя і не аказаліся бескарыснымі. А калі ў нас ёсць абвінаваўца, ёсць і Абаронца.
Пан даручыў Духу Святому чалавека, які патрапіў у рукі злодзеяў. Пан сам пашкадаваў яго, перавязаў ягоныя раны, даў яму два каралеўскія дынары. А мы, атрымаўшы дзякуючы Духу Святому вобраз і падабенства Айца і Сына, павінны памножыць дадзены нам дынар, а памножаны вярнуць Пану.
З трактату «Супраць ерасяў» св. Ірэнэя, біскупа (Lib. 3, 17, 1-3: SC 34, 302-306). © Канферэнцыя Каталіцкіх Біскупаў у Беларусі.
