Беларуска Вікторыя Навумава падзялілася з рэдакцыяй рэцэптам каляднага штолена. Яго форма нагадвае спавітае Дзіцятка Езуса. Уласна таму гэты дэсерт выпякаецца ў пачатку Адвэнту — тры з паловай тыдні, напоўненых чаканнем Хрыста.
Год таму Вікторыя разам з сям'ёй пераехала ў Таронта (Канада). Але і на другім канцы свету яна застаецца вернай каталіцкім традыцыям. Сярод іх і падрыхтоўка да Божага Нараджэння.
У сваім блогу беларуска падрабязна расказвае, як прыгатаваць святочны штолен.
«Па гэтым рэцэпце я гатую сем гадоў»
«Мне вельмі спадабалася ідэя дэсерту, які я пабачыла ў аднаго блогера ў 2009 годзе: выпякаеш у першыя дні снежня, а раскрываеш толькі на Божае Нараджэнне. З таго часу кожны год гатую штолен і ем з задавальненнем 25 снежня.
Многія пытаюцца: як хапае цярплівасці не з’есці штолены да Калядаў? Штолен добры і адразу пасля выпечкі, але пасля вытрымкі ён проста цудоўны!
Форма штолена нагадвае спавітае Дзіцятка Езуса. Уласна таму гэты дэсерт выпякаецца ў пачатку Адвэнту — усе гэтыя тры з паловай тыдні напоўнены чаканнем прыйсця Хрыста ў гэты свет.
Па гэтым рэцэпце я гатую сем гадоў. Цеста — не дрожджавае, а тварожнае, вельмі простае.
Інгрэдыенты для двух вялікіх штоленаў:
- 250 гр масла
- 250 гр мяккага тварагу
- 250 гр цукру
- 2 яйкі
- 1 пачак ваніліну або ванільнага цукру
- Цэдра і сок аднаго сярэдняга лімона
- Прыкладна 700 гр мукі
- 2,5 чайныя лыжкі разрыхляльніка
+ - 200 гр сумесі разынак (цёмныя і светлыя)
- 100 гр сухой вішні (па магчымасці)
- 150 мл каньяку
- 100 гр цукатаў
- 150 гр пакрышанага міндалю
+ - для прапіткі:
- 200 гр масла
- прыкладна 100 гр цукровай пудры
Крок першы
Бяром разынкі і вішню, прамываем і запарваем кіпенем на некалькі хвілін. Зліваем ваду, заліваем іх каньяком. Пакідаем пры хатняй тэмпературы на суткі. Перыядычна перамешваем, каб усё прапіталася каньяком. У выніку каньяк цалкам упітаецца і выліваць лішкі вам не давядзецца.
Сухафрукты выкладваем на папяровую сурвэтку і крыху прасушваем.
Крок другі
Размякчанае масла ўзбіваем з цукрам і ванілінам (ванільным цукрам). Паступова ўводзім 2 яйкі. Дадаем тварог, пакрышаныя арэхі, цэдру і сок лімона. Паступова прасейваем муку з разрыхляльнікам і замешваем мяккае, не надта густое цеста. Умешваем настоеныя сухафрукты і цукаты.
Цеста не трэба мэтанакіравана доўга вымешваць, інакш штолены будуць цвёрдымі і сухімі.
Крок трэці
Дзелім цеста на 2 часткі. З кожнай часткі робім пляскаты праснак, на 1/3 праснаку праводзім мяжу рабром далоні і заварочваем да яе астатнюю частку. Гэта робіцца для таго, каб надаць штолену тую самую форму спавітага немаўляці.
Такую ж працэдуру робім з другой часткай цеста.
Ставім штолены ў разагрэтую да 180 градусаў духоўку на 40–45 хвілін. Правярайце гатоўнасць драўлянай палачкай або запалкай. Палачка павінна выходзіць сухой.
Звярніце ўвагу на тое, што цэнтральная частка атрымаецца шырэйшай, а бакі — вузейшымі. Таму часта бывае, што бакі вельмі моцна падсыхаюць пры выпечцы. Кантралюйце цэнтр.
Крок чацвёрты
Дастаём гатовыя штолены з духоўкі і выкладваем на расцеленую фольгу. Яшчэ гарачымі шчодра паліваем растопленым маслам і пасыпаем цукровай пудрай. Заварочваем у 2 слаі фольгі. Чакаем, пакуль да канца астынуць, і хаваем у халоднае месца, дзе яны і будуць захоўвацца да Божага Нараджэння.
Кулінарных поспехаў!
