Аляксандра зацікавіла наступнае пытанне. У першым разделе Кнігі Быцця падрабязна апісваецца стварэнне свету Богам. Далей (пар Быц 2, 2-3) чытаем: «І дабраславіў Бог сёмы дзень і асвяціў яго; бо ў той дзень спачыў ад усіх дзеяў Сваіх, якія Бог тварыў і ствараў».
Пазней, калі Бог прамаўляе да Майсея (пар Зых 20, 8-11) мы даведваемся, што сёмы дзень — гэта дзень суботні, які народ абраны павінен шанаваць. Вядома, што асобныя краіны адлічваюць пачатак тыдня з нядзелі і тады ўсё зразумела. З чым звязана, што ў нашай традыцыі мы святкуем сёмы дзень ў нядзелю?
Адказвае кс. Валдзіс Дрыксна:
Дарагі Саша, справа тут простая. Няпраўда, што для хрысціян нядзеля з’яўляецца сёмым днём тыдня. Якраз нядзеля і ёсць першым днём тыдня.
Возьмем Еванглелле ад Яна (пар Ян 20, 1), дзе напісана дакладна: «А ў першы дзень тыдня на досвітку, калі было яшчэ цёмна, прыйшла да магілы Марыя Магдалена і ўбачыла, што камень адвалены ад магілы».
Хрысціянін ведае, што нядзеля з’яўляецца першым днём тыдня. Хрысціяне святкуюць Уваскрасенне Пана, якое прыпадае на першы дзень тыдня, не адпачынак Шабату, а Пасху. Калі ж прымаем удзел у нядзельнай Эўхарыстыі, і калі слухаем уважліва словы святара, то можам згадаць такія словы:
«Таму мы стаім перад Табою, злучаныя з усім Касцёлам, адзначаючы першы дзень тыдня, у якім Езус Хрыстус уваскрос і спаслаў на апосталаў Духа Святога...».
Ксёндз Валдзіс Дрыксна, святар Ліепайскай дыяцэзіі (Латвія), дактарант Інстытута Біблейскіх Навук Люблінскага Каталіцкага ўніверсітэта св. Яна Паўла ІІ.
Калі ў вас ёсць пытанні, якія датычаць Святога Пісання, дасылайце іх на адрас director@catholic.by. У тэме ліста пазначце: «Цяжкія старонкі Бібліі».
