Беларускі святар дзеліцца з чытачамі парталу Сatholic.by сваімі разважаннямі пра тое, як чалавек можа рэалізаваць свае самыя глыбокія памкненні.
Калісьці чалавек захацеў быць, як Бог. Але ў яго не атрымалася.
А Бог захацеў стаць чалавекам. І стаўся ім.
Чалавек захацеў падняцца ў неба. І для гэтага змайстраваў вялізны механізм і апрануўся ў скафандр.
А Бог захацеў сысці на зямлю. Без нічога, безабаронна.
Чалавек, калі вярнуўся на зямлю, сказаў: «Я не бачыў у небе Бога, таму Яго няма».
А Бог сказаў: «Я знайшоў на зямлі чалавека, хоць ён да непазнавальнасці змяніўся з-за граху».
Чалавек сказаў: «Калі Бога няма, то нават думкі пра Яго нам не патрэбныя — выкінем Яго з нашага жыцця».
А Бог сказаў: «Я ведаю, што Я патрэбны чалавеку. Хоць ён ад Мяне ўвесь час уцякае».
Чалавек захацеў стаць, як Бог.
Але толькі Бог, які стаў чалавекам, можа стацца дарогай да рэалізацыі гэтага памкнення.
