Працягваем цыкл відэа, прысвечаны малітве. У гэтым выпуску мы прапануем затрымацца на яе парозе, каб прысвяціць некаторы час падрыхтоўцы.
Няма нічога новага ў сцвярджэнні, што да кожнай важнай падзеі, размовы, сустрэчы мы адпаведна рыхтуемся, калі маем такую магчымасць. У малітоўным жыцці таксама патрэбен наш высілак, каб найлепшым чынам адказаць на Божае запрашэнне сустрэцца з Ім.
Каб усвядоміць, перад Кім мы стаім, унутрана засяродзіцца і скіраваць думкі і сэрца да Бога, спатрэбіцца ўся нашая ўвага і час.
Каб гэтыя некалькі хвілін, прысвечаныя падрыхтоўцы, сапраўды дапамаглі «ўвайсці» ў малітву, мы сёння раскажам пра некаторыя практыкаванні для слыху, дыхання і цела, а таксама пра вобразныя шляхі да ўнутранага супакою. Вядома, гэта толькі частка багатага досведу людзей, якія моляцца. Гэта заахвочванне спрабаваць розныя спосабы падрыхтоўкі да малітвы і практыкаваць найбольш прыдатныя для вас у канкрэтнай сітуацыі.
