Увесь час, дадзены чалавеку, можа быць ахоплены малітвай. «Заўсёды маліцеся і не падайце духам», — кажа Езус (Лк 18, 1). Але як гэта выглядае ў звычайным жыцці?
Мы адчуваем, што малітва — гэта штосьці большае, чым набор асобных дзеянняў і слоў. З яе дапамогаю мы пакліканыя будаваць адносіны з Богам, угрунтаваныя на вернасці і любові. Калі на сэрцы радасна і спакойна, нам лёгка ўзнесці малітву падзякі, але і хвіліны цярпення, пусткі, расчаравання могуць стаць глыбокай малітвай.
Дзякуючы ёй мы вучымся глядзець на свет і на сваё жыццё вачыма Стварыцеля і Збаўцы, шукаць перадусім Ягонага Валадарства.
Паглядзім шырэй на тое, чым ёсць малітва, і спынімся сёння на самым агульным падзеле формаў малітвы, усведамляючы разам з тым пэўную ўмоўнасць гэтага падзелу. Найлепшым спосабам малітвы для канкрэтнага чалавека будзе той, які дапамагае яму ўзрастаць у любові.
