Турак Мехмет Алі Агджа, які ў 1981 годзе страляў у Папу Рымскага Яна Паўла ІІ, выказаў жаданне сустрэцца з сённяшнім Пантыфікам у Каіры, куды той павінен прыбыць з візітам 28 красавіка.
Пра гэта паведамляе электронная версія газеты Gulf news.
«Калі папа Францішак дасць згоду на сустрэчу, то я паеду для гэтага ў егіпецкую сталіцу», — заявіў Алі Агджа. Афіцыйных каментароў з боку Ватыкана па гэтым пытанні пакуль няма.
Грамадзянін Турцыі Мехмет Алі Агджа (нар. у 1958 г.) з падпольнай арганізацыі «Шэрыя ваўкі» страляў у Папу Рымскага Яна Паўла ІІ 13 мая 1981 года. Пантыфік быў цяжка паранены і праапераваны.
Пасля замаху Алі Агджа быў прысуджаны італьянскім судом да турэмнага зняволення, але ў 2000 годзе памілаваны і экстрадыраваны ў Турцыю. Там ён быў арыштаваны за іншае злачынства і правёў у турме яшчэ 10 гадоў.
Ян Павел ІІ наведаў яго ў італьянскай турме ў 1983 годзе. У 2009 годзе Агджа аб’явіў пра свой пераход з ісламу ў хрысціянства і неаднаразова казаў пра свой намер прыняць сан каталіцкага святара. Апостальскі двухдзённы візіт Папы Рымскага Францішка ў Егіпет распачащся 28 красавіка.
Тым часам у Егіпце ў сувязі з візітам Пантыфіка ўзмоцнены меры бяспекі. Паліцыя Каіра праводзіць праверку жылых раёнаў і пешаходаў у заходняй частцы горада, на некалькіх асноўных трасах егіпецкай сталіцы забаронена паркоўка.
