Сацыялістычны ўрад Францыі ўвёў новы закон, які абмяжоўвае свабоду слова тых, хто выступае супраць абортаў. Зняволенне і высокі штраф — такія пакаранні чакаюць за распаўсюджванне інфармацыі, якая «перашкаджае» перарыванню цяжарнасці.
Новы закон — гэта пашырэнне рашэнняў, прынятых у 1993 годзе, калі была забаронена дзейнасць, скіраваная на пераконванне жанчын адмовіцца ад забойства ненароджаных дзяцей. Тады перш за ўсё ішла гаворка пра маніфестацыю, а цяпер закон ахоплівае і дзейнасць праз інтэрнэт. За публікацыю матэрыялаў на тэму перарывання цяжарнасці, якія могуць «дэзінфармаваць» і знеахвоціць жанчын рабіць аборты, цяпер у Францыі пагражае зняволенне на два гады і штраф у памеры 30 тысяч еўра.
Перад прыняццем новага закона ў Францыі прайшло яго абмеркаванне. Супраць выказаліся рэспубліканцы і Нацыянальны фронт. У Парыжы супраць новага заканадаўства, а таксама за права ненароджаных на жыццё выступалі тысячы людзей.
На сёння ў Францыі аборты легальныя без абмежаванняў да 12 тыдняў цяжарнасці. Штогод 200 тысяч францужанак вырашаюць перарваць цяжарнасць. Таксама апошнім часам дзяржаўная рада прыняла рашэнне выдаліць з французскага тэлебачання рэкламу, у якой паказваюцца вясёлыя дзеці з сіндромам Даўна. На думку рады, такая рэклама можа негатыўна паўплываць на самапачуццё жанчын, якія перарвалі цяжарнасць толькі з-за таго, што ў іх дзяцей быў выяўлены гэты сіндром.
Паводле CREDO
(VGr)
