«Сусветныя дні моладзі ў Панаме будуць мець важнае значэнне для ўсёй Цэнтральнай Амерыкі», — перакананы прэфект Дыкастэрыі па справах свецкіх сям’і і жыцця. Сваімі думкамі пра будучы форум кардынал Кевін Фарэл падзяліўся ў інтэрв’ю ватыканскай газеце L’Osservatore Romano.
Іерарх заўважыў, што ўпершыню ў гісторыі «трохгадовы шлях Сусветных дзён моладзі, які закончыцца міжнародным святкаваннем падзеі, мае марыйную тэматыку».
«Гэта падкрэсліць прысутнасць Маці Божай у жыцці моладзі, і ў першую чаргу, у веры і пабожнасці народаў Цэнтральнай Амерыкі», — лічыць ён.
Прэфект прызнаўся, што выбар Панамы месцам правядзення будучага форума падтрымалі епіскапаты ўсіх суседніх краін. Панама адыгрывае адмысловую ролю ў рэгіёне, бо адсюль Евангелле пачало пранікаць на амерыканскі кантынент. Першая дыяцэзія ў мацерыковай частцы Амерыкі была заснавана ў 1513 г. менавіта на тэрыторыі гэтай краіны.
Ватыканскі іерарх станоўча ўспрыняў ідэю запрасіць на Сусветныя дні моладзі юнакоў і дзяўчат іншых канфесій. Гэта заўсёды рабілася, заўважыў ён, але ў амерыканскім кантэксце гэты заклік можа мець большае значэнне і стаць адказам Каталіцкага Касцёла на выклік празелітызму з боку сектаў.
Каментуючы рашэнне аб правядзенні Сусветных дзён моладзі ў студзені (у перыяд інтэнсіўнай вучобы для студэнтаў з Еўропы і ЗША), кардынал Фарэл заўважыў, што форум не ўпершыню пройдзе ў гэты час. Зімой 1995 г. праводзіліся таксама Сусветныя дні моладзі ў Маніле, якія сталі самымі масавымі ў гісторыі.
Сусветныя дні моладзі ў Панаме пройдуць 22-27 студзеня 2019 г. Пры выбары даты правядзення форума галоўным чынам улічваліся кліматычныя асаблівасці рэгіёну. Летам — у звычайную для правядзення СДМ пару — тут назіраецца сезон дажджоў.
