Падчас агульнай аўдыенцыі 28 жніўня папа Францішак заклікаў да асаблівай малітвы за мір у дзень, калі 80 гадоў таму распачалася жудасная трагедыя сучаснасці — Другая сусветная вайна.
Як паведаміла польская рэдакцыя парталу Vatican News, прамаўляючы да пілігрымаў з Польшчы, Святы Айцец сказаў:
«Дарагія браты і сёстры, 1 верасня спаўняецца 80 гадоў з таго дня, калі выбухнула Другая сусветная вайна, якая распачалася з нацысцкай, нямецкай агрэсіі супраць Польшчы.
У той час, калі ў сталіцы краіны Варшаве, у Велюню і ў іншых гарадах будуць праходзіць памятныя мерапрыемствы з удзелам шматлікіх кіраўнікоў дзяржаваў з усяго свету, мы ўсе будзем маліцца за мір, каб ніколі больш не паўтарыліся трагічныя падзеі, справакаваныя нянавісцю, якія прынеслі толькі знішчэнне, пакуты і смерць.
Будзем жа прасіць Бога, каб мір панаваў у чалавечых сэрцах, у сем’ях, грамадствах і паміж народамі».
«Даручаю ўсіх вас Матчынай апецы Каралевы супакою і ад усяго сэрца вас благаслаўляю», — сказаў папа Францішак.
