20 снежня студэнты Міждыяцэзіяльнай гродзенскай вышэйшай духоўнай семінарыі разам з прэфектам кс. Андрэем Лішко наведалі дом-інтэрнат у Галавічполлі.
Штогод семінарысты наведваюць дзетак, каб падзяліцца з імі радасцю надыходзячых святаў Божага Нараджэння і сведчаннямі ўласнага перажывання гэтага радаснага перыяду.
Радасць і ўсмешка на тварах маленькіх выхаванцаў інтэрната сведчылі аб тым, што дзеці з нецярплівасцю чакалі прыезду сваіх даўніх сяброў з духоўнай семінарыі і нават падрыхтавалі для іх цудоўную тэатральную пастаноўку аб Божым Нараджэнні. На заканчэнне невялікага спектакля кожны атрымаў салодкі пачастунак.
У цёплай атмасферы блізкіх ужо Калядаў семінарысты паразмаўлялі з выхаванцамі інтэрната, расказалі ім пра сэнс Божага Нараджэння і выслухалі пажаданні дзяцей ад нованароджанага Езуса Хрыста.
На працягу ўсёй семінарыйнай фармацыі будучыя святары выхоўваюць у сабе пачуццё неабыякавасці да найбольш патрабуючых, каб заўсёды быць гатовым выйсці насустрач бліжняму і праявіць да яго сваю любоў.
