Стварэнне падобнага плана ўпершыню абмяркоўвалася на сустрэчы дапаможнага біскупа Мінска-Магілёўскай архідыяцэзіі Аляксандра Яшэўскага SDB з духавенствам рэгіёна ў верасні 2015 года.
Тады іерарха толькі прызначылі біскупскім вікарыем для г. Магілёва і Магілёўскай вобласці. Праз тры гады, як адзначае біскуп, тую задумку нарэшце ўдалося ажыццявіць.
«Раней я ствараў толькі асабісты план душпастырскага служэння, але цяпер яго атрымася пашырыць, — адзначыў іерарх. — Рыхтуючы працоўны варыянт, я ўлічваў тры аспекты: штодзённую душпастырскую дзейнасць, важныя даты для Магілёўскага рэгіёна і маё служэнне як біскупа».
Сёння, каб даведацца пра рэлігійнае жыццё ў рэгіёне, пастырскую дзейснасць біскупа, а таксама паасобныя мерапрыемствы ў парафіях Магілёўшчыны, дастаткова спраўдзіць у планеры.
Спампаваць план можна ТУТ>>
План душпастырскай дзейнасці — гэты тры ў адным: каляндар з пералікам урачыстасцей і юбілейных дат, планер падзей і мерапрыемстваў у рэгіёне, накіраваных на яго развіццё, а таксама важныя даты ў жыцці святароў і кансэкраваных асобаў Магілёўшчыны.
Дакумент складзены на 2018-2019 душпастырскі год і прызначаны як для духавенства, так і для свецкіх вернікаў рэгіёна. На працягу года ў залежнасці ад патрэбаў часу ён будзе абнаўляцца.
«Планаванне, супрацоўніцтва і каардынацыя – важныя ўмовы, якія зробяць наша служэнне больш эфектыўным і арганізаваным», − перакананы біскуп Яшэўскі.
Іерарх дадае, што, улічваючы вопыт мінулага, трэба браць з яго лепшае, назапашваць і не баяцца спрабаваць новае.
«Я веру, што план агульнадушпастырскай дзейнасці прывядзе да калегіяльнай адказнасці за Касцёл і росквіту веры ва ўсходняй частцы архідыяцэзіі, — прызнаецца біскуп. — Няхай Святы Дух дапаможа нам распазнаць Божую волю адносна нашага рэгіёна, супольнасцей і нас саміх».
