У 33-ю нядзелю звычайнага перыяду Святы Айцец устанавіў Сусветны дзень бедных. Кіруючыся яго заклікам «Дзяліцеся з беднымі, каб зразумець Евангелле», у санктуарыі Маці Божай Фацімскай у Баранавічах было арганізавана святкаванне гэтай падзеі.
19 лістапада ў 12.00 з гэтай нагоды тут распачалася святая Імша, якую ўзначаліў біскуп Пінскі Антоні Дзям’янка. Пасля сумеснай малітвы прайшоў канцэрт музычнага гурта пінскай семінарыі «Подых Духа» і ансамбля «Крушына» з гарадскога пасёлка Крошын. Таксама быў арганізаваны пачастунак для ўсіх прысутных.
Перажытая ўрачыстасць стала яшчэ адной нагодай для ўзмацнення салідарнасці вернікаў і духавенства дыяцэзіі з найбольш патрабуючымі з супольнасці Касцёла, каб таксама разам з імі імкнуцца да Валадарства любові і міласэрнасці.
