28 жніўня ў парафіі Найсвяцейшага Сэрца Езуса ў Лебедзеве прайшла сустрэча выпускнікоў гродзенскай Вышэйшай духоўнай семінарыі 2000 года.
Сёлета сустрэчу арганізоўваў і прымаў сваіх аднакурснікаў, якіх сабралася 16 чалавек, кс. Уладзімір Русак, пробашч парафіі ў Лебедзеве. Два святары не змаглі далучыцца.
Як адзначыў кс. Уладзімір Русак, святары гэтага выпуску стараюцца сустракацца штогод. «Такія сустрэчы, несумненна, маюць вялікае значэнне: сабрацца, паразмаўляць, паразважаць, падзяліцца вопытам. Шэсць гадоў разам — гэта штосьці значыць. Таму мы стараемся захоўваць братэрства сярод аднакурснікаў», — дадаў пробашч парафіі ў Лебедзеве.
Святую Імшу ўзначаліў біскуп Віцебскі Алег Буткевіч — адзін з аднакурснікаў. Іерарх прамовіў казанне, заахвочваючы сабраных святароў і вернікаў да малітвы за пакліканых і аб новых пакліканнях.
Выпускнікі гродзенскай семінарыі 2000 года паходзяць з усіх дыяцэзій Беларусі, бо на час іх паступлення ў Беларусі дзейнічала толькі семінарыя ў Гродне.
Гэты выпуск абагаціў Касцёл у Беларусі руплівымі святарамі, якія нясуць служэнне па ўсёй Беларусі і за мяжой. Адзін з іх — кс. Алег Буткевіч — у студзені 2015 г. атрымаў біскупскае пасвячэнне. Выпускнік кс. Аляксандр Рагіня знаходзіцца на дыпламатычнай службе і працуе павераным у справах Апостальскай Нунцыятуры ў Чадзе. Ксёндз Аляксандр Амяльчэня ўзначальвае Беларускую рэдакцыю Ватыканскага радыё ў Рыме. Ксёндз канонік Антоній Грэмза з’яўляецца віцэ-канцлерам Гродзенскай курыі. Ксёндз канонік Пётр Шарко з’яўляецца дэканам Нясвіжскага дэканату. Ксёндз Уладзімір Русак — былы віцэ-рэктар семінарыі ў Пінску, цяпер выкладчык у пінскай семінарыі.
