30 красавіка ў парафіі св. Антонія ў Слуцку прайшла прыміцыйная святая Імша а. Стэфана Пупейкі OFM — першага святара з гэтай парафіі.
Сярод гасцей ва ўрачыстасці ўдзельнічалі дапаможны біскуп Мінска-Магілёўскай архідыяцэзіі Юрый Касабуцкі і браты францішканскага ордэна.
У гаміліі іерарх падкрэсліў важную ролю сям’і ў распазнанні паклікання, а таксама падтрымку родных і блізкіх на далейшай дарозе жыцця, прысвечанага Богу. Акрамя таго біскуп нагадаў, што святар з’яўляецца другім Хрыстом: «калі благаслаўляе святар, благаслаўляе сам Хрыстус; калі святар адпускае грахі, прабачае сам Хрыстус. Праз святара дзейнічае сам Бог і адорвае нас ласкамі».
Айцец Стэфан Пупейка OFM прыняў прэзбітэрскае пасвячэнне 22 красавіка ў базыліцы айцоў францішканаў у Катавіцах-Паневніках з рук арцыбіскупа Катавіцкага Віктара Скворца.
