Пошук

10.04.2017 00:00  

9 красавіка, у Пальмовую нядзелю, парафію Святога Міхала Арханёла ў Багданаве (Івянецкі дэканат) наведаў дапаможны біскуп Мінска-Магілёўскай архідыяцэзіі Юрый Касабуцкі. У гэты дзень іерарх благаславіў тры крыжы — адзін на званіцы і два на будынку касцёла.

Крыжы былі выраблены на ахвяраванні дабрачынцаў кавалем Зыгмундам Собка з Баранавіч.

Літургія святой Імшы, згодна з традыцыяй гэтага дня, распачалася на вуліцы ля прыкасцёльнага крыжа, дзе адбылося благаслаўленне вербных галінак, а затым супольнасць у працэсіі ўвайшла ў касцёл. На пачатку біскуп Юрый заахвоціў вернікаў засяродзіцца на таямніцы Хрыстовага ўваходу ў Ерузалем, а таксама патлумачыў значэнне пальмавых галінак.

Пасля прачытання Мукі Езуса Хрыста біскуп звярнуўся да прысутных з гаміліяй, у якой падкрэсліў сэнс Хрыстовага прыніжэння: Езус прагнуў нанова аднавіць адзінства чалавека з Богам.

Як падкрэсліў іерарх, чалавек праз грэх і нявернасць дабравольна згаджаецца на духоўнае калецтва, аднак праз Хрыста Нябесны Айцец працягвае чалавеку міласэрную руку і вяртае яму духоўнае здароўе і Божае сыноўства.

З гісторыі парафіі

Драўляны касцёл святога Міхала Арханёла ў Багданаве быў пабудаваны ў сярэдзіне XVII стагоддзя. Фундатарам касцёла быў Богдан Сапега. У 1812 годзе святыня была моцна пашкоджана французскімі салдатамі, а пазней, у 1846 годзе, адноўлена намаганнямі мясцовага дзедзіца Фердынанда Рушчыца.

У 1944 годзе касцёл быў спалены адступаючымі нямецкімі войскаімі, а ў тым жа годзе нанова пабудаваны мясцовымі жыхарамі. У 1982 святыня ізноў была разабрана і спалена, але ўжо мясцовым калгасам.

У 1996 годзе касцёл адбудаваны намаганнямі айцоў францішканаў з Гальшан і мясцовых жыхароў, і ў гэтым жа годзе асвячоны біскупам Гродзенскім Аляксандрам Кашкевічам.

З 2015 года, дзякуючы ахвяраванням дабрачынцаў і мясцовай парафіяльнай супольнасці, намаганнямі кс. пробашча Ігара Лашука аднаўляецца знешні фасад касцёла. Збудавана цалкам новая званіца, праводзяцца працы па замене даху, узводзіцца вежа, на якой будзе змешчаны вялікі крыж.

(VGr)

Абноўлена 01.11.2017 11:52
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця