Пошук

29.10.2016 08:53  

28 кастрычніка ў мінскім архікатэдральным касцёле адбылася святая Імша ў свята свв. Сымона і Юды Тадэвуша, апосталаў. Удзельнікі Эўхарыстыі павіншавалі Мітрапаліта Мінска-Магілёўскага арцыбіскупа Тадэвуша Кандрусевіча, які ў гэты дзень адзначае свае імяніны.

У Імшы, якую ўзначаліў Мітрапаліт, прынялі ўдзел таксама Апостальскі Нунцый у Беларусі арцыбіскуп Габар Пінтэр, дапаможныя біскупы Мінска-Магілёўскай архідыяцэзіі Юрый Касабуцкі і Аляксандр Яшэўскі SDB.



Як нагадаў у гаміліі арцыбіскуп Тадэвуш Кандрусевіч, хрысціянскія аўтары першых стагоддзяў пішуць, што Сымон і Юда разам праводзілі апостальскую дзейнасць у Персіі і там загінулі мучаніцкай смерцю. Адсюль можна зрабіць выснову, што таму ў літургіі яны ўспамінаюцца разам і ў адзін дзень.



«Калі мы будзем уважліва чытаць Евангелле, то з лёгкасцю ўбачым, што апосталы не заўсёды былі руплівымі і сапраўднымі лідарамі, якіх мы б хацелі ў іх бачыць. Аднак у Дзеях апосталаў мы ўбачым, як яны змяніліся пасля Спаслання Святога Духа! Дзякуючы гэтаму яны сталі такімі, якімі мы хочам іх бачыць – герольдамі веры, — адзначыў іерарх. — Тыя, якія спалі падчас малітвы Езуса перад Яго цярпеннямі, а потым у хвіліну небяспекі збеглі ад Яго, сталі вернымі Яго наступнікамі аж да праліцця крыві. Тыя, якія са страху перад пераследам схаваліся ў Вячэрніку, сталі бясстрашнымі прапаведнікамі Евангелля».



«Калі паглядзім на сябе, то, напэўна, знойдзем шмат супольнага з апосталамі перад Пяцідзясятніцай, — дадаў арцыпастыр. — Мы баімся і зачыняемся ў вячэрніку нашых асабістых інтарэсаў і толькі думаем аб тым, каб ніхто нас не трывожыў, нават сам Бог. Саромеемся публічна прызнацца ў сваёй веры…»

«Ці можна яшчэ ў абставінах секулярызму, які ўмацоўваецца, і адмаўлення ад хрысціянскіх каштоўнасцяў захаваць веру і быць яе сведкамі? Ці яшчэ ёсць надзея? (…) Прыклад апосталаў паказвае, што надзея ёсць. Калі яны былі ўмацаваны Божай ласкай, то і мы таксама можам атрымаць яе ў дастатку. Неабходна толькі следаваць іх прыкладу, а менавіта дазволіць, каб у нашых душах адбыўся цуд Пяцідзясятніцы. Неабходна дазволіць Святому Духу нас перамяніць», — сказаў іерарх.



Нагадваючы, што ў хрысціянскай традыцыі апостал Юда Тадэвуш лічыцца апекуном у цяжкіх справах, Мітрапаліт заклікаў вернікаў даручыць іх нялёгкія справы і праблемы Касцёла гэтаму святому. «Няхай праз яго заступніцтва Бог адорыць нас неабходнымі для іх вырашэння ласкамі, каб па прыкладу св. Сымона мы былі руплівымі ў захаванні Божага закону», — пажадаў арцыбіскуп

Напрыканцы Імшы арцыпастыра павіншавалі з імянінамі прадстаўнікі святароў, кансэкраваных асобаў і некаторых парафій.


(AG)

Абноўлена 05.06.2017 13:34
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа