Кардынал Крыстаф Шонбарн OP, папскі пасланнік на ўрачыстасці 25-годдзя заснавання Мінска-Магілёўскай мітраполіі, 1 ліпеня наведаў кармэлітанскія супольнасці на Мядзельшчыне.
Першым прыпынкам іерарха стала мядзельская Кальварыя, дзе госця з Аўстрыі разам з дэлегацыяй, якая суправаджае кардынала падчас яго прабывання ў Беларусі, сустракалі вернікі і пробашч парафіі Маці Божай Шкаплернай у Мядзелі.
![](/3/../2/images/phocagallery/2016/07/2016-07-01-miadzel/thumbs/phoca_thumb_l_2016-07-01-narach-001.jpg)
Айцец Юрый Кулай OCD з парафіі Маці Божай Шкаплернай прадставіў гісторыю з’яўлення мядзельскай Кальварыі і распавёў пра этапы яе аднаўлення: сённяшнія прыпынкі Крыжовага шляху, якія існуюць у Мядзелі, ужо трэція па ліку.
«Такія людзі ратавалі веру і выратавалі Касцёл»
Кардынал у сваю чаргу высока ацаніў веру мядзельскіх католікаў:
«Ваш народ не толькі праходзіў прыпынкамі Кальварыі, але і перажываў яе, – зазначыў іерарх. – Асабліва гэты шлях перажылі вашыя бабулі. Такія людзі ратавалі веру і выратавалі Касцёл. Дзякуючы іх веры, сёння ўзводзяцца новыя святыні, за якія дзякуем Пану Богу».
Звяртаючыся да вернікаў на Кальварыі, папскі пасланнік адзначыў, што крыж – гэта не толькі цярпенне і смутак, але і надзея. Іерарх пажадаў мядзельскім парафіянам памятаць у цяжкія хвіліны жыцця пра крыж і надзею, якую ён дае.
У напамін аб сваім візіце кардынал Шонбарн распісаўся ў кнізе ганаровых гасцей парафіі, пакінуўшы пажаданні нашчадкам.