«Трываць у Любові Хрыста» — на такую тэму прайшлі рэкалекцыі ў Адамавічах для дзяўчат. У кляштар да сясцёр Кармэлітак Дзіцятка Езус, якія нясуць служэнне пры мясцовай парафіі Унебаўзяцця Найсвяцейшай Панны Марыі, прыбыла амаль трыццаць дзяўчат.
Удзельніцы рэкалекцый разважалі аб прабачэнні: як жыць у згодзе з Богам, у згодзе з самім сабой і з тымі, хто побач, як захаваць сваё сэрца вольным ад цяжару крыўды і злосці. На гэтыя і іншыя пытанні ўдзельніцы шукалі адказы ў Божым слове, падчас працы ў групах, у хвіліны адарацыі, цішыні і роздуму.
Падзяліцца сваім вопытам да дзяўчат прыехаў кс. Аляксандр Фядотаў SCJ з супольнасці айцоў сэрцанаў. Штодзённая супольная малітва, удзел у Эўхарыстыі, познія вечаровыя адарацыі пры свечках, шпацыр па ваколіцах — усё спрыяла таму, каб наблізіцца да спазнання і разумення міласэрнай любові Хрыста — крыніцы прабачэння.
Хвайніцкая Ірына (VGr)
Фота аўтара
