З 1 па 4 сакавіка навучэнцы Вышэйшай духоўнай семінарыі ў Гродне перажывалі вялікапосныя рэкалекцыі, якія ў гэтым годзе праводзіў кс. Валерый Быкоўскі. Падчас духоўных практыванняў рэкалекцыяніст паступова ўводзіў будучых святароў у таямніцу прынятага Хросту, якая з’яўляецца невычэрпнай крыніцай усяго хрысціянскага жыцця.
У шматлікіх канферэнцыях былі закрануты тэмы, якія найбольш хвалююць сучаснага вучня Хрыста. Кс. Валерый падзяліўся з семінарыстамі ўласным досведам рознабаковага святарскага служэння.
Вялікапосныя рэкалекцыі — гэта час, які дазваляе паглядзець на сябе і на сваё жыццё вачыма, поўнымі бескарыслівай любові і Айцоўскага прабачэння; вачыма, якія цярпліва чакаюць нашага навяртання, вачыма, якія напоўнены выратавальнымі для свету слязьмі ўкрыжаванага Пана, Езуса Хрыста.
Ад імя ўсёй семінарыйнай сям’і дзякуем шаноўнаму кс. Валерыю за прысвечаны час, за шчырасць і прагненне дзяліцца з іншымі найкаштоўнейшым скарбам у жыцці кожнага святара — досведам асабістага спаткання з Хрыстом, Спрадвечнай Любоўю.
![](/2/images/phocagallery/2017/03/2017-03-06-grodna-seminaryja/thumbs/phoca_thumb_l_grodno-002.jpg)