Пошук

23.12.2016 17:10  

У святую ноч Божага Нараджэння вялікае святло заззяла над зямлёй. Адзінародны Сын Божы, Езус Хрыстус, «выракся самога сябе, прыняўшы постаць слугі» (Флп 2, 7) i прыйшоў у гэты свет як убогае, пакорнае, безабароннае Дзіцятка. Сапраўдны Бог стаўся чалавекам, каб усяму чалавецтву аб’явіць у паўнаце сваю бясконцую любоў.

Падобна як пастухі з ваколіц Бэтлеема, якія ў тую ноч вартавалі свой статак, сёння мы чуем тыя самыя словы Добрай Навіны: «Не бойцеся, я абвяшчаю вам вялікую радасць, якая будзе для ўсяго народу, бо нарадзіўся вам сёння ў горадзе Давіда Збаўца, якім ёсць Хрыстус Пан» (Лк 2, 10-11). Асвячаныя святлом веры, мы прыбываем да стаенкі і схіляем галаву перад Нованароджаным Збаўцам, у абліччы якога ззяе найцудоўнейшая з таямніц: таямніца Божай любові.

Даверымся гэтай любові і адкрыем нашы сэрцы Хрысту. Няхай Той, які нарадзіўся для нас, народзіцца таксама ў нас. Дазволім Яму перамяніць наша жыццё, напоўніць яго радасцю, надзеяй, супакоем. Няхай у нашых сем’ях, у месцах вучобы і працы, у супольнасцях, да якіх мы належым, і ва ўсім грамадстве будзе як мага больш узаемнай павагі, дабрыні, міласэрнасці і прабачэння. Тады мы адчуем сапраўдную радасць, якую нясе нам Нованароджаны Сын Божы.

У поўныя радасці і хвалы святы Божага Нараджэння атачаю вас усіх, дарагія браты і сёстры, сваёй малітвай і складаю самыя сардэчныя віншаванні. Няхай Езус Хрыстус кожнаму шчодра благаславіць, умацоўваючы ў веры, надзеі і любові, няхай адорыць добрым здароўем і ўдзеліць шчодрасць усялякіх ласкаў. Няхай Новы год Панскі 2017 будзе паспяховым і шчаслівым, а кожны яго дзень праходзіць пад знакам Божага благаслаўлення.

Вясёлых святаў!

Аляксандр Кашкевіч
Біскуп Гродзенскі

grodnensis.by

Абноўлена 05.06.2017 13:31
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця