У Смаргоні сабраты салезіяне, сёстры салезіянкі, юнакі з прэнавіцыята, а таксама іх бацькі і родныя сабраліся разам на дзяленне аплаткай. Падобныя сустрэчы ладзяцца не першы год, што спрыяе еднасці не толькі паміж прадстаўнікамі салезіянскай кангрэгацыі, але і паміж іх бацькамі.
Памятаючы і шануючы прыгожую традыцыю дзялення аплаткай, якая сімвалізуе адзінства, салезіяне разам са сваімі бацькамі сабраліся за вігілійным сталом. На пачатку сабраныя паслухалі ўрывак з Евангелля, які распавядае аб нараджэнні Збаўцы. Потым усе разам заспявалі калядкі. Падчас дзялення аплаткай гучалі добрыя пажаданні і перапрашэнні.
На завяршэнне сустрэчы, якая прайшла 19 снежня, Рэгіянальны настаяцель Салезіянскага Таварыства ў Беларусі ксёндз Віктар Гайдукевіч SDB выказаў надзею, што гэтыя сустрэчы стануць традыцыйнымі.
Паводле sdb.by
(VGr)
