30 кастрычніка ў лідскай парафіі Узвышэння Святога Крыжа (Фара) прайшло свята для дзяцей, прысвечанае ўрачыстасці Усіх Святых. Ад вікарыя парафіі кс. Валерыя Спірыдона дзеці атрымалі заданне пераапрануцца ў сваіх любімых святых, а таксама распавесці пра іх удзельнікам свята.
1 лістапада Каталіцкі Касцёл адзначае ўрачыстасць Усіх Святых. У гэты дзень вернікі дзякуюць Богу за дар святасці і аддаюць пашану ўсім святым — як вядомым, так і невядомым, — якія дасягнулі вечнай хвалы і прабываюць з Богам у небе.
У многіх краінах, у тым ліку і ў Беларусі, у ноч з 31 кастрычніка на 1 лістапада апошнім часам шырока адзначаецца так званы «хэлоўін» — для многіх забаўляльнае свята, а па сутнасці — небяспека для душы.
Па словах святара, дзецям трэба своечасова тлумачыць сутнасць урачыстасці Усіх Святых, а таксама казаць пра небяспеку ўдзелу ў акцыях «хэлоўіна», які з кожным годам усё больш рэкламуецца і становіцца чаканым святам для многіх маладых людзей.
Ксёндз Валерый Спірыдон нагадаў дзецям, што святыя насамрэч існыя — «яны жывуць і апякуюцца намі».
На заканчэнне свята дзеці атрымалі цукеркі ад пробашча за працу над касцюмамі і сведчанне веры.
(VGr)
