24 кастрычніка ў капліцы Вышэйшай духоўнай семінарыі ў Гродне адбылася сустрэча святароў Гродзенскай дыяцэзіі, у якой прынялі ўдзел біскуп Гродзенскі Аляксандр Кашкевіч і дапаможны біскуп Гродзенскай дыяцэзіі Юзаф Станеўскі.
На сустрэчы быў абмеркаваны парадак заканчэння Юбілейнага Года Міласэрнасці ў Гродзенскай дыяцэзіі, а таксама справы душпастырскіх груп і рухаў у дыяцэзіі.
Сярод іншага было названа імя святара, прызначанага Канферэнцыяй Каталіцкіх Біскупаў у Беларусі міждыяцэзіяльным экзарцыстам. Ім стаў а. Ян Хернік OFM Conv.
Таксама была праанансавана дыяцэзіяльная сустрэча членаў «Жывога Ружанца» ў санктуарыі Маці Божай Цярпліва Слухаючай, якая адбудзецца ў Капцёўцы 29 кастрычніка.
Святароў заахвоцілі да арганізацыі груп пілігрымаў з Гродзенскай дыяцэзіі ў Вільнюс на ўрачыстасць Маці Божай Міласэрнасці, якая лічыцца апякункай дыяцэзіі.
3 лістапада ў гродзенскай катэдры, як і ў іншых парафіях дыяцэзіі, будуць маліцца за памерлых святароў.
На 12 лістапада ў Лідзе запланаваны дыяцэзіяльны з’езд сем’яў.
