18 кастрычніка ў гродзенскай катэдральнай базыліцы св. Францішка Ксаверыя прайшла святая Імша ў інтэнцыі медыкаў Гродзеншчыны. Ужо стала традыцыяй, што ў дзень літургічнага ўспаміну св. Лукі, апекуна ўсіх медыкаў, працаўнікі медыцынскіх устаноў Гродна збіраюцца на супольнай малітве.
Імшу ў інтэнцыі ўрачоў, медсясцёр і ўсіх працаўнікоў медустаноў узначаліў дапаможны біскуп Гродзенскай дыяцэзіі Юзаф Станеўскі.
У гаміліі іерарх падкрэсліў важную ролю прадстаўнікоў гэтай прафесіі ў абвяшчэнні Евангелля там, куды святар альбо іншы вернік дайсці не можа. «Езус прагне, каб вы былі сведкамі Ягонай любові сярод хворых і церпячых, вы, якія верыце, разумееце і спазнаеце міласэрнасць, вы, якія маеце адпаведную медыцынскую кваліфікацыю і вялікае сэрца», — сказаў біскуп.
Іерарх заахвоціў усіх, хто звязаны з медыцынай і служэннем хворым, «даваць сведчанне Божай любові, углядацца ў Езуса Хрыста, самага ўважлівага Лекара, Крыніцу жыцця, асаблівага Апекуна чалавека». Біскуп дадаў, што трэба пераймаць Езуса ў далікатным стаўленні да хворых і інвалідаў.
Ксёндз Віталь Сідорка, капелан гродзенскага душпастырства службы аховы здароўя імя свв. Космы і Дам’яна, падзякаваў прысутным за дар супольнай малітвы праз заступніцтва св. Лукі, які апякуецца службай здароўя, і заахвоціў далучыцца да душпастырства, якое ў Гродне дзейнічае ўжо на працягу амаль 10 гадоў.
Пасля Імшы адбылася сустрэча біскупа Юзафа Станеўскага з персаналам медыцынскіх устаноў. Іерарх падзякаваў усім супрацоўнікам службы аховы здароўя за ахвярнае служэнне, якое яны нясуць сярод хворых у розных шпіталях і месцах пражывання пажылых і самотных людзей, пажадаў, каб гэтую штодзённую паслугу яны выконвалі заўсёды з вялікай радасцю і каб янa прыносіла добрыя плёны.
Паводле grodnensis.by
(AG)
Фота grodnensis.by
