Пошук

08.08.2016 00:00  

З 5 па 7 жніўня праходзіла XV пешая пілігрымка з Гродна ў дыяцэзіяльны санктуарый Езуса Журботнага ў Росі. «Дакрануцца да Божай міласэрнасці» — такім быў дэвіз пілігрымкі, у якой удзельнічала каля 300 чалавек з розных месцаў Гродзенскай дыяцэзіі, а таксама з Масквы і Вільнюса.

У пілігрымцы прымалі ўдзел розныя пакаленні вернікаў, але найбольш — моладзі. Некаторыя хлопцы і дзяўчаты ўдзельнічалі ў сёлетніх Сусветных днях моладзі ў Кракаве, адкуль прывезлі ўспаміны, якімі дзяліліся з прысутнымі.



З кожным годам пілігрымаў на шляху ў Рось становіцца больш, усё новыя людзі «зараджаюцца» прагай пілігрымавання ад сваіх знаёмых. Шляхам пілігрыма ідуць і тыя, для каго, як кажуць самі, пілігрымаванне да Езуса Журботнага стала традыцыяй.

Шлях праходзіў праз розныя мясцовасці і вёскі, уключаючы сустрэчы з людзьмі, якія выносілі кубак зімной вады, гародніну і садавіну са сваіх падворкаў, прысмакі…
У Юбілейны Год Міласэрнасці пілігрымы маліліся Вяночак да Божай Міласэрнасці. Ва ўсіх вёсках пры крыжах, дзе збіралася вялікая колькасць вернікаў, каб прывітаць пілігрымаў, разам з вяскоўцамі пілігрымы падчас малітвы прасілі Бога, каб быў міласэрны да іх і ўсяго свету.

Такім чынам арганізатары пілігрымкі хацелі нагадаць аб вартасці і сіле гэтай малітвы, а таксама заахвоціць людзей прамаўляць яе кожны дзень.



Цэнтральным пунктам кожнага дня пілігрымкі была святая Імша. Сёлета Эўхарыстыю штодзень цэлебравалі гродзенскія біскупы, якія хацелі такім чынам суправаджаць сваіх дыяцэзіян у дарозе да санктуарыя.



Ад імя пілігрымаў хачу выказаць удзячнасць усім, хто актыўна ўключыўся ў арганізацыю пешай пілігрымкі: святарам, семінарыстам, тым, хто прымаў на начлег, рыхтаваў пасілак, усім людзям добрай волі за тое, што не былі абыякавымі, а праз слова і ўчынак рабілі дабро бліжняму.

Кс. Юрый Марціновіч, кіраўнік пілігрымкі Гродна-Рось

 

Фотарэпартаж >>>

Абноўлена 05.06.2017 13:31
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа