Пошук


25.07.2016 00:00  

24 ліпеня вырушыла ў шлях VII пешая пілігрымка з Гродна на месца мучаніцкай смерці благаслаўлёных сясцёр назарэтанак у Навагрудку.

Пілігрымы пачалі свой шлях пасля святой Імшы, якая прайшла ў гродзенскім рэктаральным касцёле Звеставання Найсвяцейшай Панны Марыі і якую ўзначаліў кс. Віталій Сідорка, прэфект Вышэйшай духоўнай семінарыі ў Гродне.



У пілігрымцы ўдзельнічаюць больш за 50 чалавек. У гэтым годзе падчас яе будуць разважаць над жыццём дванаццатай сястры назарэтанкі Малгажаты Банась, якая адзіная з навагрудскай манаскай супольнасці засталася ў жывых. Сёлета прыпадае 50-годдзе смерці Слугі Божай Малгажаты Банась, таму ў ходзе пілігрымкі будуць асабліва маліцца аб яе хутчэйшай беатыфікацыі.

Маршрут пілігрымкі: Гродна — Азёры — Астрына — Шчучын — Орля — Хвіневячы — Наваельня — Навагрудак. У цэлым вернікі пераадолеюць амаль 150 км, каб прыбыць на ўрачыстасці 73-й гадавіны расстрэлу мучаніц у Навагрудку.



У першы дзень пілігрымкі яе ўдзельнікаў прывітаў у дарозе біскуп Гродзенскі Аляксандр Кашкевіч, які заклікаў іх асабліва маліцца праз заступніцтва благаслаўлёных мучаніц з Навагрудка ў інтэнцыі сем’яў Беларусі, а таксама за моладзь усяго свету, якая хутка будзе перажываць Сусветныя дні моладзі ў Кракаве.

Іерарх заахвоціў даваць праз сваё пілігрымаванне прыгожае сведчанне ўсім людзям, якіх пілігрымы будуць сустракаць на шляху, і казаць ім аб Езусе, які багаты на міласэрнасць і ласку.

Мучаніцы з Навагрудка былі забіты 1 жніўня 1943 г. нацыстамі падчас Другой сусветнай вайны. Беатыфікацыя сясцёр была здзейснена Папам Янам Паўлам ІІ у Рыме 5 сакавіка 2000 года.

Кс. Юрый Марціновіч, (AG)

Фотарэпартаж >>>

Абноўлена 05.06.2017 13:31
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа