Кожны год шкаплерная сям'я з усёй Беларусі збіраецца ў Гудагаі, каб памаліцца перад цудатворным абразом Маці Божай Шкаплернай. Таксама і сёлета 16 ліпеня цэлы дзень у маленькае мястэчка на мяжы з Літвой прыбывалі пілігрымы пешшу, на веласіпедах, машынах і аўтобусах.
![](/3/../2/images/stories/news/2016/07/2016-07-18-gudagai2.jpg)
Вечарам святую Імшу для вернікаў цэлебраваў новапрэзбітэр а. Аляксандр Стока OCD. На Эўхарыстыі таксама прысутнічаў а. Аркадзь Куляха OCD, які ў гэты дзень адзначаў свой 50-гадовы юбілей. Гудагайская парафія была першай пляцоўкай яго душпастырскага служэння.
![](/3/../2/images/stories/news/2016/07/2016-07-18-gudagai1a.jpg)
![](/3/../2/images/stories/news/2016/07/2016-07-18-gudagai1c.jpg)
Пасля Імшы а. Аляксандр Стока удзяліў усім прысутным прыміцыйнае благаслаўленне.
Потым адбыўся традыцыйны Крыжовы шлях па гудагайскай Кальварыі. Каля тысячы вернікаў прайшлі больш за 7 кіламетраў праз узгоркі і лес, разважаючы над цярпеннем Езуса Хрыста.
![](/3/../2/images/stories/news/2016/07/2016-07-18-gudagai8.jpg)
![](/3/../2/images/stories/news/2016/07/2016-07-18-gudagai6.jpg)
![](/3/../2/images/stories/news/2016/07/2016-07-18-gudagai7.jpg)
Завяршэннем гэтага дня стала працэсія са свечкамі і святая Імша апоўначы, якую ўзначаліў дапаможны біскуп Мінска-Магілёўскай архідыяцэзіі Аляксандр Яшэўскі SDB.
![](/3/../2/images/stories/news/2016/07/2016-07-18-gudagai11.jpg)
![](/3/../2/images/stories/news/2016/07/2016-07-18-gudagai12.jpg)
«Рыхтуючыся да стагоддзя Фацімскіх аб’яўленняў, прагнем у гэтым святым месцы з новай сілай пачуць заклік нашай Нябеснай Маці да пакаяння, каб перастаць абражаць Бога нашымі грахамі», — заўважыў біскуп у гаміліі.
Іерарх таксама адзначыў, што ўрачыстасці ў Гудагаі — яшчэ адна магчымасць падзякаваць Богу за 25-гадовы юбілей аднаўлення структур Каталіцкага Касцёла ў Беларусі.
«Сёння ў гэтым санктуарыі праз рукі Маці Божай Шкаплернай будзем узносіць падзяку Усемагутнаму Богу за 25 гадоў рэлігійнай свабоды ў нашай краіне і развіццё нашага Касцёла», — сказаў біскуп Аляксандр Яшэўскі.
Пасля Імшы пачалося традыцыйнае начное чуванне ў касцёле. Вернікі з усёй Беларусі звярталі свае просьбы і падзякі да Маці Божай Шкаплернай, трываючы ў малітве да світання.
А. Сяргей Трысцень OCD, (MV)
Фота Аляксандры Шчыглінскай