Старшыня Канферэнцыі Каталіцкіх Біскупаў у Беларусі арцыбіскуп Юзаф Станеўскі, Мітрапаліт Мінска-Магілёўскі, скіраваў спачуванні у сувязі са смерцю айца Гжэгажа Ксёнжка, піяра, які доўгі час служыў у Беларусі.
Шаноўны ксёндз Матэвуш Піндэльскі ад Марыі Беззаганнай, Правінцыял Польскай правінцыі айцоў піяраў,
супольнасць айцоў піяраў у Беларусі,
з вялікім смуткам многія ў нашай краіне ўспрынялі паведамленне супольнасці айцоў піяраў у Беларусі, што раніцай 6 кастрычніка на 55-м годзе зямнога жыцця, 35-м годзе манаскага жыцця і 28-м годзе святарства адышоў у вечнасць айцец Гжэгаж Ксёнжэк SP, які доўгі час нёс служэнне ў нашай краіне, у тым ліку ў парафіі Найсвяцейшай Панны Марыі, Маці Касцёла, у горадзе Чавусы на Магілёўшчыне (Мінска-Магілёўская архідыяцэзія), дзе правёў 12 гадоў.
Сёння адбылася пахавальная святая Імша і абрад пахавання спачылага святара ў парафіяльным касцёле Найсвяцейшага Імя Марыі ў Кракаве (Польшча).
Выказваю шчырыя спачуванні родным спачылага і братам з Ордэна айцоў піяраў з прычыны яго смерці і запэўніваю ў нашай малітве за памерлага айца Гжэгажа Ксёнжка SP, сябра Каталіцкага Касцёла ў Беларусі, ад імя кожнага, з кім ён сустрэўся падчас душпастырскага служэння ў супольнасцях у нашай краіне: у Лідзе (Гродзенская дыяцэзія) і Чавусах на Магілёўшчыне (Мінска-Магілёўская архідыяцэзія).
Вечны адпачынак дай яму, Пане…
✠ Юзаф Станеўскі
Мітрапаліт Мінска-Магілёўскі,
Старшыня Канферэнцыі Каталіцкіх Біскупаў у Беларусі
Мінск, 9 кастрычніка 2024 г.
