Трэці дзень VIII Парафіяды дзяцей і моладзі Гродзенскай дыяцэзіі, 22 чэрвеня, удзельнікі распачалі святой Імшой у гродзенскім парафіяльным касцёле Божай Міласэрнасці (Вішнявец).
Імшу ўзначаліў новапрэзбітэр кс. Ян Варанецкі. Прысутнічаў таксама новапрэзбітэр кс. Павел Скуба, які разам з ім прыняў прэзбітэрскае пасвячэнне 4 чэрвеня. На заканчэнне Эўхарыстыі новапрэзбітэры ўдзялілі прыміцыйнае благаслаўленне кожнаму ўдзельніку Парафіяды.
Затым удзельнікі скіраваліся на галоўны стадыён Гродна «Нёман», дзе адбыліся спартыўныя спаборніцтвы. Тут маладыя людзі паказалі, што менавіта ў здаровым целе здаровы дух.
Таксама ўдзельнікі Парафіяды паказалі, што ў спорце, як і ў жыцці, без намаганняў няма поспеху, і што спорт — тое, што здольна адцягнуць маладога чалавека ад шэрай манатоннасці штодзённасці, тое, што дазваляе зразумець самога сябе; што дзякуючы яму дзеці і моладзь могуць атрымаць незабыўныя эмоцыі, забыць аб праблемах і стрэсах; дзякуючы яму чалавек можа дасканала развівацца і пазнаваць свае магчымасці.
У гэты дзень удзельнікі Парафіяды маглі паказаць свае здольнасці ў спаборніцтвaх па футболе, валейболе, настольным тэнісе, бадмінтоне, кіданні мяча, бегу, скачках у даўжыню з разбегу і шашках.
Вечарам адбылося ўрачыстае ўзнагароджванне пераможцаў спартыўных спаборніцтваў. Дапаможны біскуп Гродзенскай дыяцэзіі Юзаф Станеўскі ўручыў ім медалі, кубкі і дыпломы.
Іерарх пажадаў ім далейшых поспехаў і дасягненняў у спорце і выказаў надзею, што ўдзел у Парафіядзе будзе для кожнага магчымасцю лепш пазнаць Бога і нагодай духоўнага ўзрастання для маладых дыяцэзіян — будучыні Касцёла на Гродзеншчыне.
Трэці дзень Парафіяды завяршыўся танцамі і супольнай малітвай.
Кс. Юрый Марціновіч, (AG)
Фота Максіма Хаванскага
