Пошук


22.06.2016 11:20  

Другі дзень VIII Парафіяды дзяцей і моладзі Гродзенскай дыяцэзіі распачаўся святой Імшой ў гродзенскай парафіі Найсвяцейшага Адкупіцеля (Дзевятоўка). 

Імшу ўзначаліў дапаможны біскуп Мінска-Магілёўскай архідыяцэзіі і біскуп вікарый для Магілёўскага рэгіёна Аляксандр Яшэўскі SDB, які таксама звярнуўся да прысутных з гаміліяй.

На св. Імшы сабраліся ўсе ўдзельнікі Парафіяды разам са сваімі душпастырамі і манаскімі сёстрамі, якія падтрымліваюць іх у гэтыя дні.

«Па прыкладзе першага Пантыфіка св. Пятра ў гэтым Надзвычайным Годзе Божай Міласэрасці мы ўсе павінны навучыцца прызнаваць Езуса сваім Месіяй, а таксама Міласэрным Айцом», — зазначыў у гаміліі іерарх.

Біскуп Аляксандр пацікавіўся ва ўдзельнікаў Парафіяды, што з’яўляецца для іх самым важным у жыцці. Адказы былі самымі рознымі: застацца веруючым да канца жыцця, не страціць у малітве Бога, трываць у нястомным кантакце з Богам...

Зыходзячы з адказаў моладзі, біскуп з Магілёва пажадаў ёй,  каб гэтыя важныя для іх рэчы яны ўсе захавалі ў сваім хрысціянскім жыцці да канца і паглыблялі іх, дзелячыся з іншымі дарам веры.

Нагадваючы пра Евангелле з дня — якая запаведзь найбольшая ў законе і адказ на гэта Хрыста «любі Бога ..... і бліжняга ..... », іерарх заахвоціў дзяцей і моладзь «праяўляць любоў да Бога асабліва праз Эўхарыстыю», «цаніць дар Езуса ў табэрнакулюме» і «ўчыніць з нядзельнай святой Імшы сапраўднае сэрца, якое заўсёды б’ецца з любоўю».

«Рабіць усё — толькі не грашыць»

Кажучы пра Парафіяду і спаборніцтва ў ёй, біскуп пажадаў заўсёды кіравацца любоў’ю да бліжняга як да самога сябе. «Тады кожнае наша спаборніцтва будзе сведчаннем нашых хрысціянскіх каштоўнясцяў», — дадаў біскуп Яшэўскі.

Напрыканцы літургіі біскуп Аляксандр Яшэўскі SDB падзякаваў Богy за прыгожы досвед сустрэчы падчас Эўхарыстыі. Іерарх таксама выказаў падзяку ардынарыю Гродзенскай дыяцэзіі біскупу Аляксандру Кашкевічу і яго дапаможнаму біскупу Юзафу Станеўскаму за запрашэнне, а асабліва кс. Артуру Малафею.

Іерарх з Магілёва падзякаваў і ўдзельнікам Парафіяды за сведчанне веры, а  святарам, кансэкраваным асобам і навучэнцам Вышэйшай духоўнай семінарыі ў Гродне — за правядзенне Парафіяды Гродзенскай дыяцэзіі, назваўшы Парафіяду «інвестыцыяй у будучыню Касцёла ў Беларусі».

Біскуп Яшэўскі развітаўся з удзельнікамі VIII Парафіяды словамі свайго заснавальніка св. Яна Боско: «Рабіць усё, толькі не грашыць».

Кс. Юрый Марціновіч, (IL)

Фотарэпартаж >>>

Абноўлена 05.06.2017 13:31
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця