6 жніўня Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB адзначыў 50-гадовы юбілей з дня нараджэння.
Віншаванні з гэтай нагоды іерарху, які нясе пастырскае служэнне ў Магілёўскім рэгіёне, даслала Надзвычайны і Паўнамоцны Пасол Венгрыі ў Рэспубліцы Беларусь доктар Зіта Ілона Бенчык.
Звяртаючыся да іерарха, дыпламат, між іншым, піша:
«Дазвольце сардэчна павіншаваць Вас з юбілеем і малітоўна пажадаць доўгіх гадоў жыцця і Божай дапамогі ў Вашым пастырскім служэнні, моцнага здароўя і душэўных сілаў у выкананні Вашай місіі».
У віншавальным лісце цытуецца таксама ўрывак са Святога Пісання з благаслаўленнем першасвятара Аарона: «Няхай благаслаўляе цябе Пан і аберагае цябе! Няхай Пан распраменіць сваё аблічча над табою і адорыць цябе ласкай. Няхай Пан скіруе на цябе свой погляд і адорыць цябе мірам» (Ліч 6, 24–26).
Біскуп Аляксандр Яшэўскі шчыра дзякуе за віншаванні і прыгожыя малітоўныя пажаданні, абяцаючы ў адказ сваю малітву аб Божым благаслаўленні для Пасла Ілоны Бенчык, супрацоўнікаў пасольства і ўсяго народа ўмілаванай Венгрыі.
