12 кастрычніка ў мемарыяльным комплексе каля вёскі Леніна, што ў Горацкім раёне Магілёўскай вобласці, прайшло святкаванне 80-й гадавіны бітвы, якая адбылася тут падчас Другой сусветнай вайны.
12–13 кастрычніка пад Леніна ў баявых дзеяннях узяла ўдзел першая пяхотная дывізія імя Тадэвуша Касцюшкі, вайскоўцы якой правялі свій першы бой з сіламі Вермахта ў складзе 33-й арміі Заходняга фронту.
У памятным мерапрыемстве, прысвечаным 80-й гадавіне бітвы, ўзяў удзел Мітрапаліт Мінска-Магілёўскі арцыбіскуп Юзаф Станеўскі.
Іерарх памаліўся за палеглых католікаў, якія поплеч з людзьмі іншых нацыянальнасцяў і веравызнанняў вызвалялі беларускую зямлю ад гітлераўскіх захопнікаў і аддалі сваё жыццё «за вольнасць нашу і вашу», у адпаведнасці з дэвізам супольнага нацыянальнага героя беларусаў і палякаў Тадэвуша Касцюшкі, чыё імя насіла дывізія.
Як паведаміў інфармацыйны партал газеты «Горецкий вестник» GorkiNews, афіцыйныя асобы, у тым ліку прадстаўнікі праваслаўнага і каталіцкага духавенства, госці, дэлегацыі працоўных калектываў, моладзь і ўдзельнікі грамадскіх аб’яднанняў у межах памятнага мерапрыемства ўсклалі кветкі і гірлянды да помніка вайскоўцам на польскіх могілках.
Кветкі былі ўскладзены таксама да палявых магіл. Каля музея савецка-польскай баявой садружнасці прайшоў урачысты мітынг.
