Уладзімір Пракапцоў стаў афіцэрам ордэна Зоркі Італіі. Так высока італьянскі бок ацаніў уклад дырэктара Нацыянальнага мастацкага музея Беларусі ў культурнае супрацоўніцтва паміж Італіяй і Беларуссю.
Сярод сумесных праектаў пасольства Італіі і музея — сумесные выстаўкі італьянскага і беларускага жывапісу. У іх ліку і выстаўка беларускіх ікон у Музеях Ватыкана, якая прайшла з 18 мая па 25 ліпеня 2016 г.
Нагадаем, паводле слоў Мітрапаліта Мінска-Магілёўскага арцыбіскупа Тадэвуша Кандрусевіча, «гэтая выстаўка сведчыць пра тое, што музей — не статычная гісторыя, а само жыццё».
«Музей імкнецца паказаць сваё багацце і падзяліцца ім з іншымі. І праз гэта ён прымае актыўны ўдзел у новай евангелізацыі, якая з’яўляецца галоўным заданнем Касцёла ў час аслаблення веры», — адзначаў іерарх 29 верасня падчас адкрыцця выстаўкі беларускіх ікон, якія экспанаваліся ў Ватыкан, у Нацыянальным мастацкім музеі Беларусі.
— У наступным годзе нас таксама чакае ўнікальны выставачны праект, але ён пакуль у сакрэце, — адзначыў Уладзімір Пракапцоў, атрымліваючы ордэн з рук пасла.
Цырымонія ўзнагароджвання прайшла ў межах XVI Сусветнага тыдня італьянскай мовы.
