24 верасня ў супольнасці святога Бэнэдыкта ў Жытоміры (Украіна) склала вечныя манаскія абяцанні сястра Аўгустына Ганна Ціхан OSB, якая паходзіць з парафіі Божай Міласэрнасці ў Лідзе.
Жытомірскі кляштар бэнэдыктынак — кляўзуровы, закрыты. Гэта значыць, што сёстры, якія ў ім жывуць, ставяць за мэту не актыўнае жыццё, напоўненае кантактамі з людзьмі, навучаннем дзяцей і моладзі, працай пры парафіях, але жыццё закрытае ад людскіх вачэй за мурамі кляштара, дзе ў цішыні яны служаць Богу, разважаючы над Яго Словам, молячыся Літургію гадзін, зарабляючы на сваё ўтрыманне фізічнай працай у кляштарным агародзе і ў разнастайных майстэрнях.
Такім чынам сёстры бэнэдыктынкі выконваюць дэвіз свайго ордэна: «Ora et labora» — «Маліся і працуй».
Ва ўрачыстасцях прыняла ўдзел і дэлегацыя з лідскай парафіі Божай Міласэрнасці на чале з пробашчам кс. Андрэем Зноскам. У складзе дэлегацыі быў родны брат с. Аўгустыны — дыякан Яўген Ціхан, а таксама маці, родныя і блізкія, парафіяне.
