На працягу трох дзён у супольнасці Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску праходзілі рэкалекцыі, прысвечаныя пачатку новага навучальнага года. Іх праводзіў для навучэнцаў семінарыі дапаможны біскуп Мінска-Магілёўскай архідыяцэзіі Аляксандр Яшэўскі SDB.
Асаблівасцю рэкалекцый на пачатак навучальнага года ў семінарыі з’яўляецца так званае «святое маўчанне», абавязковае на працягу ўсіх духоўных практыкаванняў. Семінарысты ўдзельнічалі не толькі ў канферэнцыях, але і ў супольных малітвах, святой Імшы, адарацыі Найсвяцейшага Сакрамэнту. У апошні дзень яны прынялі ўдзел у пакутным набажэнстве і маглі прыступіць да сакрамэнту пакаяння.
Галоўная тэма, якой былі прысвечаны рэкалекцыі, — «Сведкі евангельскага радыкалізму». Падчас духоўных практыкаванняў біскуп Аляксандр Яшэўскі звярнуў увагу на некалькі асноўных тэм, сярод якіх былі вера, малітва і сведчанне. Таксама рэкалекцыяніст заклікаў да больш глыбокага перажывання сакрамэнту пакаяння і паяднання, засяродзіўся на неабходнасці больш адказнай падрыхтоўкі да яго праз рахунак сумлення.
Па словах іерарха, «трэба, каб рахунак сумлення быў інтэгральным», «ён павінен улічваць стан чалавека і асаблівасці яго характару»: «якім бачыць мяне Бог? якім я з’яўляюся насамрэч?».
На заканчэнне кожнага дня і на апошняй сустрэчы семінарысты і рэкалекцыяніст дзяліліся думкамі, якія асабліва іх закранулі, а таксама перажываннямі і высновамі.
Навучэнцы і адміністрацыя семінарыі падзякавалі біскупу Аляксандру Яшэўскаму за правядзенне духоўных практыкаванняў і аддзячылі сціплымі падарункамі ад усёй супольнасці.
Паводле seminaryja.by
(AG)
Фота seminaryja.by
