У межах падрыхтоўкі да 100-годдзя аб’яўленняў Маці Божай у Фаціме выдавецтва «Pro Christo» прапануе малітоўнік з тэкстамі для правядзення Агульнабеларускай навэнны да Найсвяцейшай Панны Марыі. Навэнна распачалася 6 жніўня, у свята Перамянення Пана, будзе адбывацца на працягу 9 месяцаў і завершыцца 1 красавіка 2017 года.
Малітоўнік мае сімвалічную назву «Няхай Тваё Беззаганнае Сэрца зменіць свет» — гэта заклік да Маці Божай, які выкарыстоўваў у сваіх малітвах святы Ян Павел ІІ. Дарэчы, паводле яго выказванняў пабудавана істотная частка малітваў, прапанаваных у кнізе.
Выданне складаецца з чатырох частак:
1) «Навэнна», у якой змешчаны малітоўныя тэксты;
2) «Разважанні на кожны дзень навэнны»;
3) «Ружанец перапрашэння Беззаганнага Сэрца Марыі»;
4) «Набажэнства першых суботаў месяца».
Структура малітоўніка абумоўлена тым, што Агульнабеларуская навэнна будзе адбывацца ў першыя суботы месяца і спалучана з адпаведным набажэнствам, да якога заклікала Маці Божая Фацімская.
«Заахвочваю святароў, кансэкраваных асобаў і вернікаў не толькі актыўна ўдзельнічаць у навэнне, але і распаўсюджваць набажэнства першых суботаў месяца, каб такім чынам перапрасіць Марыю за грахі, якімі зневажаецца Яе Беззаганнае Сэрца, а таксама каб падзякаваць Ёй за апеку над намі. Даверым жа сябе Божай міласэрнасці, у якой наша надзея!» — заклікае арцыбіскуп Тадэвуш Кандрусевіч у звароце з нагоды правядзення навэнны, благаслаўляючы на ўдзел у ёй і ў набажэнстве першых суботаў месяца.
Тыя, хто не змог далучыцца да навэнны 6 жніўня, могуць распачаць яе 13 жніўня — гэта дзень, у які Маці Божая чарговы раз аб’явілася ў 1917 г. фацімскім дзецям і які таксама прыпадае на суботу.
Паводле ave-maria.by
(AG)
