XXVIII Міжнародная парафіяда дзяцей і моладзі распачалася 9 ліпеня ў Варшаве. З Беларусі ў ёй прымаюць удзел 290 чалавек, якія прэзентуюць 13 парафій Гродзенскай дыяцэзіі і некалькі парафій з іншых дыяцэзій Беларусі.
Акрамя Беларусі, у Парафіядзе ўдзельнічаюць таксама прадстаўнікі Польшчы, Літвы, Латвіі, Украіны, Германіі, Славакіі і Расіі. Агульная колькасць удзельнікаў — 1,5 тысячы чалавек.
На старт
Традыцыйна ўсе ўдзельнікі Парафіяды сабраліся на святой Імшы, якую цэлебраваў дапаможны біскуп Варшавы Рафал Маркоўскі.
У гаміліі іерарх, разважаючы над евангельскай прыпавесцю пра міласэрнага самараніна, заклікаў кожнага ўдзельніка Парафіяды імкнуцца жыць міласэрнасцю і пажадаў, каб ніхто з іх ніколі не адчуваў сябе самотным і пакінутым.
Напрыканцы Імшы адбылося ўрачыстае адкрыццё Парафіяды. Па традыцыі былі ўнесены агонь і сцяг Парафіяды, затым яе ўдзельнікі і суддзі склалі прысягу.
Пасля Эўхарыстыі і вячэры адбыўся бег памяці Яна Паўла ІІ.
У гэтым спаборніцтве перамагла гродзенская парафія Маці Божай Вастрабрамскай, атрымаўшы адмысловы кубак.
На заканчэнне першага дня Парафіяды выступіў гурт «Trzecia Godzina Dnia».
Парафіяда завершыцца 16 ліпеня.
