30 кастрычніка прадстаўнікі салезіянскай сям’і ў Беларусі сабралася ў вёсцы Дварэц Дзятлаўскага раёна, каб памаліцца за памерлых сабратоў і благаславіць новыя помнікі траім з іх.
Як паведамляе сайт салезіянаў ксяндза Боско ў Беларусі sdb.by, з вёскі Дварэц салезіяне пачалі наведванне могілак памерлых сабратоў у гэтым годзе. Дварэц — месца, дзе сто гадоў таму салезіяне распачалі сваю дзейнасць на тэрыторыі Беларусі.
Добраўпарадкаванне месцаў пахавання салезіянаў адбываецца ў межах падрыхтоўкі да святкавання 100-годдзя прысутнасці членаў таварыства на Беларусі.
Цэлебрацыю святой Імшы ўзначаліў дапаможны біскуп Мінска-Магілёўскай архідыяцэзіі Аляксандр Яшэўскі SDB. Рэгіянальны настаяцель салезіянскага таварыства на Беларусі кс. Віктар Гайдукевіч SDB прывітаў прысутных і зачытаў імёны памерлых салезіянаў, якія працавалі на нашай зямлі і за якіх цэлебруецца Імша. Разам з салезіянамі маліўся і пробашч мясцовай парафіі кс. Павел Скуба.
У гаміліі пробашч парафіі св. Яна Хрысціцеля ў Мінску і дэкан дэканату Мінск-Усход кс. Аляксандр Мятліцкі SDB звярнуў увагу на тое, што кожны хрысціянін добра ведае шлях, які вядзе да збаўлення, але ведаць шлях і ісці ім – розныя рэчы. Святар адзначыў, што памерлыя сабраты пісалі гісторыю салезіянскага таварыства на гэтай зямлі, і дадаў, што сёння можна задаць сабе пытанне, якую гісторыю пішам мы і куды крочым.
Напрыканцы Імшы біскуп Аляксандр Яшэўскі падзякаваў за супольную малітву і заўважыў, што вельмі цешыцца магчымасці перажываць такі важны момант са сваімі сабратамі.
Затым прысутныя, молячыся Вяночак да Божай Міласэрнасці, накіраваліся на могілкі, дзе адбылося благаслаўленне помнікаў ксяндзу Людвіку Віткоўскаму SDB і сабратам каад’ютарам Стэфану Залеўскаму SDB і Казіміру Ляхоўскаму SDB.
Ксёндз Віктар Гайдукевіч уручыў падзячную грамату Вадзіму Грудзе, чыя фірма дапамагла пры ўсталяванні помнікаў. Каля магіл салезіянаў прагучала малітва і падзяка памерлым за іх жыццё і сведчанне.
