16 чэрвеня ў санктуарыі Маці Божай Каралевы нашых сем’яў у Тракелях (Гродзенская дыяцэзія, Радунскі дэканат) адбудзецца святая Імша ў інтэнцыі ксяндза Яна Сарэлы ў трыццаты дзень пасля яго смерці.
Пачатак у 12.00.
Духавенства, кансэкраваныя асобы і свецкія вернікі запрашаюцца разам памаліцца аб жыцці вечным для спачылагa.
Ксёндз Ян Сарэла, святар Гродзенскай дыяцэзіі, нарадзіўся 28 жніўня 1975 года, паходзіў з парафіі Адведзінаў Найсвяцейшай Панны Марыі ў Тракелях. Прэзбітэрскае пасвячэнне яму ўдзяліў 3 чэрвеня 2000 года ў катэдральнай базыліцы святога Францішка Ксавэрыя ў Гродне біскуп Аляксандр Кашкевіч.
Быў пробашчам парафій святых апосталаў Пятра і Паўла ў Ражанцы (Шчучынскі дэканат) і святога Яна Хрысціцеля ў Воўпе (Мастоўскі дэканат), адказным мадэратарам за пастаянную фармацыю святароў у Гродзенскай дыяцэзіі, мадэратарам апостальскага руху «Маргарытка». Шмат гадоў быў духоўным айцом супольнасці вышэйшай духоўнай семінарыі ў Гродне.
Адышоў у вечнасць пасля цяжкай хваробы 15 мая.
