Пошук


04.11.2010 00:00  
Год І

ПЕРШАЕ ЧЫТАННЕ

Мдр 18, 14–16; 19, 6–9

З Чырвонага мора быў шлях без перашкодаў, і яны, як ягняты, брыкаліся

Чытанне кнігі Мудрасці Саламона.

Калі спакойная ціша ахапіла ўсё,
і ноч у сваім бегу дайшла да сярэдзіны,
усемагутнае Слова Тваё з нябёсаў, з каралеўскіх пасадаў,
як няўмольны воін, упала сярод спустошанай зямлі,
як востры меч, які нясе праўдзівы Твой наказ.
І стаўшы, напоўніла ўсё смерцю,
дакраналася да неба і разыходзілася па зямлі.
Усё стварэнне зноў перамянілася ў сваёй прыродзе,
служачы Тваім наказам,
каб дзяцей Тваіх захаваць ад шкоды.
З’явілася воблака, якое зацямніла іхні лагер,
і там, дзе раней была вада, узнялася сухая зямля,
з Чырвонага мора быў шлях без перашкодаў,
з бурлівых хваляў — зялёная даліна.
Па ім прайшлі ўсім народам тыя,
каго ахоўвала Твая рука,
і ўбачылі яны дзівосныя цуды.
Яны пасвіліся, нібы коні,
і, як ягняты, брыкаліся,
праслаўляючы Цябе, Пане,
які ўратаваў іх.

Гэта слова Божае.

аРЭСПАНСАРЫЙНЫ ПСАЛЬМ

Пс 105 (104), 2–3. 36–37. 42–43 (Р.: 5а)

Рэфрэн: Памятайце пра цуды, якія ўчыніў Пан.
Або: Аллелюя.

2. Спявайце і грайце Яму псальмы, *
распавядайце пра ўсе Ягоныя цуды.
3. Ганарыцеся імем Яго святым, *
няхай радуюцца сэрцы тых, хто шукае Пана.

Рэфрэн:

36. Ён забіў кожнага першароднага ў іхняй зямлі, *
пачаткі ўсёй моцы іхняй.
37. І вывеў ізраэльцян са срэбрам і золатам, *
і не было хворага ў іх плямёнах.

Рэфрэн:

42. Бо памятаў Ён святое слова сваё, *
дадзенае Абрагаму, слузе свайму.
43. І вывеў народ свой у радасці, *
у весялосці выбраных сваіх.

Рэфрэн:
а

Год ІІ

ПЕРШАЕ ЧЫТАННЕ

3 Ян 5–8

Мы павінны стаць супрацоўнікамі праўды

Чытанне Трэцяга паслання святога апостала Яна.

Умілаваны Гай, Ты паступаеш згодна з вераю ў тым, што робіш для братоў і чужаземцаў. Яны засведчылі перад Касцёлам пра тваю любоў. Калі адправіш іх па-Божаму, добра зробіш. Бо дзеля імя Хрыстовага яны пайшлі, нічога не беручы ад язычнікаў. Таму мы павінны прымаць такіх людзей, каб стаць супрацоўнікамі праўды.

Гэта слова Божае.

аРЭСПАНСАРЫЙНЫ ПСАЛЬМ

Пс 112 (111), 1–2. 3–4. 5–6  (Р.: 1а)

Рэфрэн: Шчаслівы чалавек, які баіцца Пана.

1. Шчаслівы чалавек, які баіцца Пана *
і вельмі любіць Ягоныя запаведзі.
2. Моцным будзе ягонае патомства на зямлі, *
пакаленне праведных будзе благаслаўлёным.

Рэфрэн:

3. Дастатак і багацце ў ягоным доме, *
і справядлівасць ягоная трывае навекі.
4. Узыходзіць у цемры як святло для праведных, *
ласкавы, міласэрны і справядлівы.

Рэфрэн:

5. Шчаслівы чалавек, які міласэрны і пазычае, *
які справядліва вядзе свае справы.
6. Ён не пахіснецца ніколі, *
у вечнай памяці будзе справядлівы.

Рэфрэн:

а

СПЕЎ ПЕРАД ЕВАНГЕЛЛЕМ

2 Тэс 2, 14
Акламацыя: Аллелюя, аллелюя, аллелюя.

Пан паклікаў нас праз Евангелле,
каб мы атрымалі славу Пана нашага Езуса Хрыста.

Акламацыя: Аллелюя, аллелюя, аллелюя.
аЕВАНГЕЛЛЕ
Лк 18, 1–8

Бог абароніць выбраных сваіх, якія просяць Яго

+ Чытанне святога Евангелля паводле Лукі.

У той час:

Езус расказаў сваім вучням прыпавесць пра тое, што трэба заўсёды маліцца і не падаць духам: У адным горадзе быў суддзя, які Бога не баяўся і людзей не саромеўся. У тым самым горадзе была адна ўдава, і яна, прыходзячы да яго, казала: Абарані мяне ад праціўніка майго.

Але ён доўгі час не хацеў. А потым сказаў сам сабе: Хоць і Бога не баюся, і людзей не саромеюся, але з-за таго, што гэтая ўдава не дае мне спакою, абараню яе, каб яна не прыходзіла больш дакучаць мне.

І сказаў Пан: Паслухайце, што кажа несправядлівы суддзя. Дык ці ж Бог не абароніць выбраных сваіх, якія просяць Яго дзень і ноч, хоць і марудзіць абараніць іх? Кажу вам, што неўзабаве абароніць іх.

Аднак Сын Чалавечы, прыйшоўшы, ці знойдзе веру на зямлі?

Гэта слова Пана.



Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Абноўлена 22.06.2017 22:48
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа