ХVIІ Звычайная нядзеля, Год А

Ты папрасіў сабе розуму

Чытанне Першай кнігі Валадарстваў.

У тыя дні:

У Гібэоне з’явіўся Пан Саламону ўначы падчас сну і сказаў: Што хочаш, каб Я даў табе? І сказаў Саламон: Цяпер, Пане мой Божа, Ты паставіў каралём слугу Твайго замест бацькі майго Давіда, але я малады і недасведчаны, каб валадарыць. І вось слуга Твой сярод народа Твайго, які Ты выбраў, народа такога вялікага, што яго нельга палічыць і перапісаць. Таму дай слузе Твайму сэрца, якое будзе разумець, як кіраваць народам, як адрозніваць дабро і зло, бо хто ж можа кіраваць такім вялікім народам, як Твой? І спадабалася Пану тое, аб чым Саламон папрасіў Яго. Тады Пан сказаў яму: Паколькі ты папрасіў сабе гэта, а не прасіў доўгага жыцця, багацця або згубы сваіх ворагаў, але папрасіў розуму, каб умець судзіць, то Я зраблю паводле слова твайго. Я дам табе такое мудрае і разумнае сэрца, якога не было да цябе ні ў кога і не будзе пасля цябе.

Гэта слова Божае.

аРЭСПАНСАРЫЙНЫ ПСАЛЬМ

Рэфрэн: Як жа люблю я Твой закон, о Пане.

57. Я сказаў: Мой лёс, Пане, — *
захоўваць Твае словы.
72.  Закон вуснаў Тваіх для мяне лепшы, *
чым мноства золата і срэбра.

Рэфрэн:

76. Міласць Твая няхай мяне суцяшае, *
як сказаў Ты слузе свайму.
77. Міласэрнасць Твая няхай прыйдзе да мяне, і я буду жыць,*
бо закон Твой — суцяшэнне маё.

Рэфрэн:

127. Таму я люблю Твае запаведзі *
больш, чым золата, чым золата чыстае.
128. Таму кіруюся ўсімі загадамі Тваімі *
і ненавіджу кожны шлях ілжывы.

Рэфрэн:

129. Цудоўныя сведчанні Твае, *
таму захоўвае іх душа мая.
130. Адкрыццё словаў Тваіх асвятляе *
і дае разуменне простым.

Рэфрэн:
аДРУГОЕ ЧЫТАННЕ

Прадвызначыў быць падобным да вобраза Сына свайго

Чытанне Паслання святога апостала Паўла да Рымлянаў.

Браты:

Мы ведаем таксама, што тым, хто любіць Бога — пакліканым па Яго пастанове — усё садзейнічае дзеля дабра іхняга. Бо, каго Ён наперад пазнаў, таго і прадвызначыў быць падобным да вобраза Сына свайго, каб Ён быў першародным між многімі братамі; а каго прадвызначыў, таго і паклікаў, каго паклікаў, таго і апраўдаў; а каго апраўдаў, таго і ўславіў. Што ж скажам на гэта? Калі Бог за нас, хто супраць нас? Той, які Сына свайго не пашкадаваў, але аддаў Яго за ўсіх нас, як жа нам не дасць і разам з Ім усяго?

Гэта слова Божае.
а СПЕЎ ПЕРАД ЕВАНГЕЛЛЕМ

Прадае ўсё, што мае, і купляе яе

+ Чытанне святога Евангелля паводле Мацвея.

У той час:

Езус сказаў народу: Валадарства Нябеснае падобнае да скарбу, схаванага ў полі, які знайшоў чалавек і ўтаіў. У радасці ад гэтага ён ідзе і прадае ўсё, што мае, і купляе гэтае поле.

Яшчэ Валадарства Нябеснае падобнае да купца, які шукае прыгожых пярлін. Знайшоўшы адну каштоўную пярліну, ён ідзе і прадае ўсё, што мае, і купляе яе.

Гэта слова Пана.

Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ