Пошук


06.07.2010 01:00  
Год І

ПЕРШАЕ ЧЫТАННЕ

Зых 33, 7–11; 34, 5b–9. 28

Пан гаварыў з Майсеем тварам у твар

Чытанне кнігі Зыходу.

У тыя дні:

Майсей узяў шацёр і расцягнуў яго па-за лагерам, здалёк ад стана, і назваў яго шатром спаткання. І кожны, хто шукаў Пана, прыходзіў да шатра спаткання, які знаходзіўся па-за лагерам. Калі Майсей выходзіў да шатра, усе людзі ўставалі і кожны, стоячы каля ўваходу да сваёй палаткі, глядзеў услед Майсею, пакуль ён не ўвойдзе ў шацёр. Калі ж ён уваходзіў у шацёр, сыходзіў воблачны слуп і станавіўся пры ўваходзе. Пан гаварыў з Майсеем, а ўсе людзі бачылі воблачны слуп, што стаяў пры ўваходзе ў шацёр. І ўвесь народ уставаў, і кожны кланяўся пры ўваходзе да сваёй палаткі. А Пан гаварыў з Майсеем тварам ў твар, як чалавек звычайна размаўляе з сябрам сваім. Пасля Майсей вяртаўся ў лагер, але ягоны слуга Езус, сын Навіна, не выходзіў з шатра.

Калі Пан сышоў у воблаку, Майсей стаў паблізу Яго і абвясціў імя Пана. І прайшоў Пан перад ім, і ўсклікнуў: Пан, Пан Бог міласэрны і літасцівы, доўгацярплівы і шматміласцівы, і праўдзівы, які захоўвае міласэрнасць на тысячы пакаленняў, які даруе беззаконне, злачынства і грэх, але нічога не пакідае беспакараным і за беззаконне айцоў карае дзяцей і ўнукаў да трэцяга і чацвёртага пакалення.

Майсей адразу ўпаў на зямлю і пакланіўся Богу, і сказаў: Калі я знайшоў упадабанне ў вачах Тваіх, Пане, то няхай пройдзе Пан сярод нас, бо народ гэты з цвёрдым каркам. Даруй беззаконні нашыя і грахі нашыя і зрабі нас спадчынай Тваёй. 

Так Майсей заставаўся там з Панам сорак дзён і сорак начэй. Не еў хлеба і не піў вады. І запісаў на табліцах словы запавету — Дзесяць Запаведзяў.

Гэта слова Божае.

аРЭСПАНСАРЫЙНЫ ПСАЛЬМ

Пс 103 (102), 6–7. 8–9. 10–11. 12–13  (Р.: 8а)

Рэфрэн: Міласэрны ёсць Пан і ласкавы.

6. Пан здзяйсняе справядлівасць *
і правасуддзе для ўсіх прыгнечаных.
7. Ён паказаў шляхі свае Майсею, *
сынам Ізраэля — справы свае.

Рэфрэн:

8. Міласэрны ёсць Пан і ласкавы, *
доўгацярплівы і шматміласцівы.
9. Не злуецца вечна *
і не палае гневам навекі.

Рэфрэн:

10. Не паступае з намі паводле  грахоў нашых *
і не адплачвае паводле правінаў нашых.
11. Бо, як высока ўзносіцца неба над зямлёю, *
настолькі вялікая міласэрнасць Пана да тых, хто Яго баіцца.

Рэфрэн:

12. Як далёка ўсход ад захаду, *
так аддаліў ад нас Ён нашыя правіны.
13. Як літуецца бацька над сынамі, *
так змілуецца Пан над тымі, хто Яго баіцца.

Рэфрэн:
а

Год ІІ

ПЕРШАЕ ЧЫТАННЕ

Ер 14, 17–22

Памятай, не скасоўвай свой запавет з намі

Чытанне кнігі прарока Ераміі.

З вачэй Маіх удзень і ўночы льюцца слёзы і не сціхаюць, бо вялікім ударам будзе зломлена дзева, дачка Майго народа, будзе вельмі аслаблена паражэннем. Калі выйду на поле — вось забітыя мячом. Калі ўвайду ў горад — вось замораныя голадам. Нават прарок і святар блукаюць па зямлі, не разумеючы нічога.

Ці Ты назаўсёды адкінуў Юду? Ці стаў агідным для Тваёй душы Сіён? Чаму Ты ўдарыў нас так, што нельга ўратавацца? Мы спадзяваліся на мір, але  нічога добрага не выйшла, на час аздараўлення, але замест гэтага — жах.  

Мы ведаем, Пане, наша беззаконне і несправядлівасць нашых айцоў, бо зграшылі супраць Цябе. Дзеля імя свайго не адкідай нас, не зневажай пасад сваёй славы. Памятай, не скасоўвай свой запавет з намі.

Хіба ёсць сярод язычніцкіх ідалаў такія, што спасылаюць дождж? Хіба неба дае лівень? Ці ж не Ты гэта чыніш, Пане, Бог наш? Мы на Цябе спадзяёмся, бо Ты стварыў усё.

Гэта слова Божае.

аРЭСПАНСАРЫЙНЫ ПСАЛЬМ

Пс 79 (78), 8. 9. 11 і 13  (Р.: 9bс)

Рэфрэн: Дзеля славы імя свайго вызвалі нас, Пане.

12. Не памятай правінаў *
нашых продкаў,
няхай хутчэй нас спаткае Твая міласэрнасць, *
бо мы зусім аслаблі.

Рэфрэн:

13. Памажы нам, Божа, наш Збаўца, *
дзеля славы імя Твайго;
вызвалі нас і даруй нам грахі нашыя *
дзеля Твайго імя.

Рэфрэн:

11. Няхай дойдзе да аблічча Твайго стагнанне вязня; *
магутнасцю пляча свайго захавай асуджаных на смерць.
13. А мы, народ Твой і авечкі Тваёй пашы, †
будзем вечна Цябе славіць *
і з пакалення ў пакаленне абвяшчаць Тваю хвалу.

Рэфрэн:

а

СПЕЎ ПЕРАД ЕВАНГЕЛЛЕМ


Акламацыя: Аллелюя, аллелюя, аллелюя.

Зерне — гэта Божае слова, а сейбіт — Хрыстус;
кожны, хто знойдзе Яго, будзе жыць навекі.

Акламацыя: Аллелюя, аллелюя, аллелюя.
аЕВАНГЕЛЛЕ
Мц 13, 36–43

Пакіньце расці  разам тое і другое да жніва

+ Чытанне святога Евангелля паводле Мацвея.

У той час:

Калі Езус, адпусціўшы народ, увайшоў у дом, падышлі да Яго вучні Яго і сказалі:  Растлумач нам прыпавесць пра каласоўнік на полі. Ён жа сказаў ім у адказ: Сейбіт добрага насення — гэта Сын Чалавечы. Поле — гэта свет, добрае насенне — гэта сыны Валадарства, а каласоўнік — сыны злога; вораг, які пасеяў іх, — гэта злы дух; жніво — сканчэнне свету, а жняцы — гэта Анёлы.

Таму, калі збіраюць каласоўнік, агнём паляць; так будзе пры сканчэнні гэтага свету. Пашле Сын Чалавечы Анёлаў  сваіх,  і  збяруць яны з Валадарства Яго ўсё, што спакушае, і ўсіх, хто робіць беззаконне. I ўкінуць іх у печ вогненную: там будзе плач і скрыгатанне зубоў. Тады   праведнікі заззяюць, як сонца, у валадарстве Айца іх. Хто мае вушы, каб слухаць, няхай слухае.

Гэта слова Пана.


Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Абноўлена 22.06.2017 22:48
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця